Peqqinnissaqarfimmi passunneqarnermut atatillugu naammagittaalliuteqarnissaq periarfissaalersoq

Ullut pingasut qaangiuppata – tassa tallimanngorpat – peqqinnissaqarfimmi passunneqarneq pillugu naammagittaalliuteqartoqarsinnaalerlunilu taarsiivigineqarnissamut qinnuteqartoqarsinnaalissaaq.
Peqqinnissaqarfimmi passunneqarneq pillugu naammagittaalliuteqarnissaq taarsiissuteqarfigineqarnissamullu qinnuteqarnissaq tallimanngorpamit periarfissaalissaaq. Assi © : Christine Hyldal/ KNR
februaarip 11-at 2025 15:59

Peqqinnissaqarfimmi passunneqarnerit naammagittaalliutigerusuppiuk, imaluunniit taarsiivigineqartariaqarsorivit?

Taamaappat tamanna pillugu iliuuseqarsinnaanissamut periarfissaqalerputit. Peqqinnissaqarfiulli passunneqarnerup naammagittaalliutigineqarnissaa taarsiivigineqarnissamullu qinnuteqarnissaq tallimanngorpat ammassavaa.

Peqqissutsimut Naalakkersuisoqarfik tusagassiuutinut nalunaarummi allappoq.

Tassa Sullissivik.gl aqqutigalugu tallimanngorpamit naammagittaalliuteqarsinnaalissaatit.

Inummit ataatsimit passunneqarnerup tamaanut

Peqqinnissaqarfiup iluanut atatillugu naammagittaalliornissamut taarsiissuteqartarnermullu Inatsisartut inatsisaata atuutilernissaatigut periarfissaqalissaaq.

Inatsit maannakkutut itsillugu sulisoq aalajangersimasoq suliami kisimiilluni kukkusimappat maalaarut aatsaat akuerineqartarpoq. Tassa passussinerup ingerlarnga ataatsimut isigalugu amigaateqarsimappat pitsaanngissimappalluunniit maalaarutigineqarsinnaanngilaq.

Tamannali inatsit nutaaq februaarip 14-ianni atuutilertussaq atorlugu allanngortinneqassaaq, taamaalilluni passunneqarnerlunneq amigartumilluunniit katsorsarneqarneq pillugu maalaaruteqartoqarsinnaallunilu taarsiissuteqartoqarnissaanut qinnuteqartoqarsinnaalissaaq.