Nunarput nutaamik peqqinnissaqarfimmik nakkutilliisoqalissaaq.
Knud Brinkløv Jensen ukiut pingasut peqqinnissaqarfimmik nakkutilliisooreerluni qaammatip uuma naanerani taamaatinnialerpoq.
Nakkutilliisoqarfik massakkorpiaq pisortassarsiorpoq qinnuteqarfissarlu killilerneqarsimavoq oktoberip ulluisa 13-annut.
Soorlulusooq piffissaq kingullerpaaq atorlugu pisortassarsiortoqartoq.
Peqqinnissaqarfimmik nakkutilliisoqarfiup juunip qaammataani pisortassarsiornini nassiussimavaa. Tamatuma kingorna naalakkersuisut allatseqarfiani pisortassarsiornerup allaaserineqarnera uninngatinneqarsimavoq.
Naalakkersuisut allatseqarfiani pisortap, Jørgen Olsen-ip, nassuiaatissaqartinngilaa sooq peqqinnissaqarfimmik nakkutilliisoqarfiup pisortassarsiornera taama sivisutigisumik uninngatinneqarsimanersoq, oqarporli suut tamarmik sivisuumik suliarineqartartut.