Namminersornerullutik Oqartussat isumaqatigiinniartitaata, Palle Frederiksenip, Radioaviisimut uppernarsarpaa peqqissaasut peqatigiiffiata PPKp ilaasortaasa akuerisassaannik isumaqatigiissuteqarsimallutik.
Suut isumaqatigiissutigineqarsimaneri Palle Frederiksenip maannakkorpiaq oqaatigiumanngikkallarpai, Namminersornerullutilli Oqartussat tusagassiutitigut kingusinnerusukkut nalunaaruteqarumaarnissaat ilimasaarutigalugu.
Peqqissaasuttaaq siulittaasuat Karin Holler oqaaseqarumanngikkallarpoq.
- Isumaqatigiissut iluarisimaalaarnerlugu iluarilluinnarnerlugulunniit maannangaaq oqarsinnaanngilanga. Ilaasortavut nalunaarfigeqqaassavavut, Karin Holler Sermitsiami issuarneqarpoq.
Sapaatip-akunneri arfineq marluk isumaqatigiittoqarsinnaanngereersorlu illuatungeriit kiisami isumaqatigiissuteqarput.