Peqqinnissaqarfimmi akissarsiat 12 millioni koruuninik ilasassapput

Peqqinnissaqarfimmi sulisut aningaasarsiaasa qaffannissaannut nunatta karsia 12 millioni koruunerluinnangajannik ukiuni tullerni pingasuni ukiumut aningaasaliinerusalissaaq - procentinngorlugit 19 procentinik, tamanna aningaasaqarnermut ataatsimiititaliap immikkut ittumik akuersissutaani takuneqarsinnaavoq.
Allattoq Najaaraq Egede
juulip 27-at 2009 07:37

Peqqinnissaq Pillugu Kattuffiit aamma Namminersorlutik Oqartussat aningaasarsiat pillugit isumaqatigiinniarnerat juunimi naammassivoq.

- Nunatta Karsiata 2009-mut naatsorsuutai soorunami eqqorneqassapput, 11,7 millioni koruunimmi missingersuutiniinngereermata, taama Inatsisartut aningaasaqarnermut ataatsimiititaliaani siulittaasoq Akitsinnguaq Olsen naalakkersuisunut ilisimatitsivoq.

Tamanna AG-p nittartagaani atuarneqarsinnaavoq.

Peqqinnissaqarfimmi sulisut akissarsiaannut isumaqatigiissut ukioq manna apriilip aallaqqaataaniit ukiuni pingasuni tullerni atuutissaaq.

Peqqinnissaq pillugu Kattuffiit PPK sinnerlugu isumaqatigiinniaqataasut 19 procentimik angusaat pingaartumik sulisussaqarniarnermik pitsanngorsaanissamut tunngassuteqarpoq, soorlu peqqissaasut bioanalytikerillu aningaasarsiaat qaffannerpaallutik.