Naalakkersuisut Siulittaasuata ammaanermi oqalugiaataa partiinit tigulluarneqarpoq, pingaartumik peqqinnissaqarfiup ajornartorsiornera pillugu nassuerneq tigulluarneqarluni.Assi: KNR

Peqqinnissaqarfimmi ajornartorsiortoqarneranik nassuerneq partiit naammagisimaaraat

Múte B. Egede nassuerpoq, peqqinnissaqarfimmi annertuumik ajornartorsiortoqartoq. Partiit piumasaqarput iliuuseqartoqassasoq.

- Siulittaasup oqalugiarnermini saqqummiussaani naammagisimaakkavut isumaqataaffigisagullu arlalissuupput, pingaartumik peqqinnissaqarfimmut tunngatillugu unammilligassanut tunngasut pillugit isumaqataavugut, Demokraatit siulittaasuat, Jens-Frederik Nielsen oqarpoq.

Taamatut naliliinera Atassutip siulittaasuata , Aqqalu C. Jeremiassen-ip isumaqatigaa:

- Assut naammagisimaarpara maanna ammasumik nassuerutigimmagu, peqqinnissaqarfimmut tunngatillugu imaannaanngitsunik ajornartorsiuteqartugut, taanna oqarpoq.

Aamma Naalakkersuisut siulittaasuata nammineq parteeqataasa iluarisimaarpaat peqqinnissaqarfik pillugu ersarissumik nassuerutiginnittoqarmat aammalu immikkut iliuuseqarfigineqarnissaanik aallussisoqarmat:

- maluginiarparput Naalakkersuisut nassueriutigigaat peqqinnissaqarfimmut tunngatillugu ajornartorsiuteqarneq imaannaanngitsuusoq, tamannalu politikkikkut immikkut iliuuseqarfigineqartariaqartoq, Agathe Fontain Inuit Ataqatigiinneersoq oqarpoq.

Siulittaasoq: Ajornartorsiorneq ukiuni arlalinni piuvoq

Peqqinnissaqarfimmut tunngatillugu imaannaanngitsumik killittoqarnera Naalakkersuisut Siulittaasuata Múte Bourup Egedep oqalugiaammini ilaatigut imatut oqaaseqarfigaa:

- Nassuerutigisariaqarparpullu ukiorpanngulertuni peqqinnissaqarfimmi unammilligassaqaratta ataatsimoorluta innuttaasut pillugit iliuuseqarfigisariaqakkatsinnik. Ukiuni kingullerni marlunni peqqissaasunik nakorsanillu pissarsiniartarnerup ajornakusoornera napparsimaveqarfitsinni nalaapparput.

- Peqqinnissaqarfimmi sulisut piffissami sivitsortumi pisarnerminnit annerusumik ilungersortariaqartarsimapput aallaallu ilaatigut sulianik pingaarnersiuinerit ingerlanneqartariaqarlutik innuttaasunut malunniuttunik, Múte Borurup Egede tallimanngormat ammaanermi oqalugiaammini ilaatigut oqarpoq.

AAMMA ATUARUK Åbningstale: For få uddanner sig, og vi mangler læger og sygeplejersker

Agathe Fontain erseqqissaavoq tungiminnit naammagisimaaritsik immikkut iliuuseqarluni aaqqiissutissarsiorneq Naalakkersuisunit ingerlanneqarmat, taamaalilluni ajornartorsiutit imaannaanngitsut aaqqiiviginiarlugit sulissuteqartoqarmat.  Pingaartumik meeqqat tarnimikkut erloqissutillit napparsimasullu pillugit suliniutit naammagisimaarnerarlugit, Demokraatilli suli annertunerusumik iliuuseqartoqarnissaanik ujartuipput:

- Aaqqiissutissat tigussaasut amigaatigivagut . Oqalugiarsinnaavugut oqaatsit kusanartut atorlugit, taamaattorli aaqqiissutissanik tigussaasunik soqanngippat oqaatsit kusanartut atuuteqanngillat.

- Siusinnerusukkulli aaqqiissutaasinnaasunik saqqummiussisarpugut, assersuutigiinnarlugu peqqinnissaqarfimmut tunngatillugu, tamakkuli Naalakkersuisut kissaatiginngilaat. Taamaammat oqaatsit kusanartut atorlugit oqalunneq naammalerpoq, iliuuseqartoqartariaqalerporlu, Demokraatit siulittaasuat Jens-Frederik Nielsen oqarpoq.

Siumut: Meeqqat inuusuttullu piffissaqarluarfigalugit Múte oqalugiarpoq

Peqqinnissaqarfimmut tunngatillugu nassuerutiginninneq partiinit naammagisimaartoqarnerata saniatigut, Siumup tungaanit naammagisimaarneqarpoq Múte Bourup Egedep meeqqat inuusuttullu oqalugiaammini piffissaqarfigilluarmagit: 

- Inuunermi qanorluunniit artornartunik nalaataqarsimagaluaraanni nammineq iliuuseqarnikkut inuunerissaarsinnaaneq anguneqarsinnaasoq assersuuteqarluni oqalugiaammini ilanngussinera kaammattuuteqarneralu pingaaruteqarpoq isumaqatiginarlunilu, Doris Jakobsen Jensen Siumut sinnerlugu oqarpoq. 

Naleraq: Politikki aallartitarput suli ingerlappaat 

Naleraq iluarisimaarinnippoq Naalakkersuisut Naleqqap naalakkersuisooqataanerani politikkikkut suliniutit suli aallunneqarnerarlugit.

- Naammagisimaarparput politikkerput Naalakkersuisooqatigiinni suli initummat, Pele Broberg oqarpoq.

Aperineqarami tigussaasunik assersuuteqarsinnaanersoq, aningaasanut inatsisissaq pillugu isumaqatigiinniarnerit suli ingerlanerat innersuussutigaa, taamaammallu assersuuteqarusunngikkallarnerarluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl