Peqqinnissaq soqutigineqaleriartorpoq
Ukiut qulingiluassaat Sisimiuni peqqinnermut tunngasumik aalajangersimasumik qulequtsiillutik sapaatip akunneranik sivisussuseqartumik innuttaasunut sammisaqartitsisarneq soqutigineqaleriartortoq Sisimiuni pitsaaliuinermut siunnersori Âníse Svane Johansen radioaviisimut oqarpoq.
Ukiut tamaasa sammisaqartitsisarnertik pillugu illoqarfiup avataaneersuttaaq soqutiginnillutik suleqataarusullutillu saaffiginnittalersimasut Âníse Svane Johansenip erseqqissaatigaa.
Peqqinnermut tunngasumik sammisaqartitsisarnerup siunertaraa inuit ataasiakkaat peqqissuunissamik akisussaaffeqarnerat nukittorsartuassallugu, peqqinnerullu pisortanit akisussaaffigitinniarnerata eqqarsartaatsikkut allanngortinnissaa, Âníssi Svane Johansen oqarpoq.
Sisimiuni Brugseneeqqap pisortaata William Olsen-ip inuit peqqinnerulernissaminnik soqutiginninnerulersimanerat nioqqutissatigut malugisimanerarpaa.
Malunnarpoq ukioq manna peqqinneq pillugu sammisaqartitsinerup kingorna nioqqutissat soorlu sodavandit sapaatip akunneranut karsit 40-t tunineqartaraluartut 30- nut appariaateqarput, kiisalu naatitat ullut qulikkaarlugit piniartakkavut, maanna sioqqutisumik nunguttalerput, pingaartumik iipit banaanit vindruallu tunisaanerulerput, William Olsen Sisimiuni Brugseneeqqani pisortaasoq oqarpoq.
