Peqqinnissamut suliniutit kinguaattoorput

Ataqatigiissitsinngippallaarneq, ingerlatsiviit aalajangersimasut ikippallaarneri, sammisani sullissisut ilinniartitaanerisa ajorpallaarneri minnerunngitsumillu aningaasanik naammattunik atugassaqartitaanngiinneq. Tassa tamakkuupput Nunatsinni innuttaasut peqqissusaannik sullissinermi, taasami INUUNERITTA-mi aporfiusut ilaat. Taama naliliipput inuiaqatigiit peqqissusaannik nalunaarsuinermi paasisimasallit.
oktobarip 13-at 2011 14:30

Inuunerittap suliaasa naammassisaagallartullu, arlaannaannulluunniit attuumassuteqanngitsunit nalilersorneqarnera ippassaq saqqummiunneqarpoq. Inuiaqatigiit peqqissusaannik nalunaarsuineq aallartinneqarpoq 2006-mi naammassissallunilu 2012-mi.
Anguniakkat eqqarsaatigalugit sutigut tamatigugajak kinguaattoortoqarsimavoq. Inuiaqatigiit peqqissusaannik tigussaasumik pitsanngorsaasoqassappat, taava aningaasanut inatsimmit tamanna aningaasalersorneqartariaqartoq aammalu iluarsartuussinerinnaagitsukkut aammalu tamssuma suliniutigineqarnerinnaatiguunnaanngitsoq ingerlanneqartariaqartoq, paasisimasallit inerniliipput.
- Inerniliigallarnitsinni oqariartuutitta pingaarnersaraat, peqqissutsimik anguniagaqarneq siuarsarneqarluassappat, paasisitsiniaanermut taarsiullugu ingerlatsiviit aalajangersimasut amerlisarneqartariaqartut sulissutigineqartariaqartoq. Meeqqat kigutiginnerulernissaasa sulissutiginera iluatsilluarsimasoq assersuutissaqqippoq. Tassami meeqqat tikillugit qanoq iliuuseqartoqarsimammat.
Statens Institut for Sundhed-imi siunnersorti, naliliisullu siulittaasuat, Finn Kamper-Jørgensen oqarpoq. Ajornartorsiutit allat tassaapput piareersaasiornerup sannaata ajorpallaarnera aamma isumaginnittoqarfiit ataasiakkaat akornanni aammalu sullissisunik ataqatigiissitsineq pitsaanngitsoq.
- Tigussaasunik pilersaarusiornerit pitsaasut arlaqarput, kisiannili anguniakkat suli anguneqanngillat. Tamassumunnga pissutaavoq Kalaallit Nunaanni qullersaqarfik, kommunit aammalu sumiiffiit ataasiakkaat akornanni suleqatigiittoqanngimmat. Suliarlu inerilluartoq anguneqassappat aningaasat amigaataapput.
Finn Kamper-Jørgensen oqarpoq.
Illoqarfinni ataasiakkaani pitsaaliuisut amerlanertigut ilinniagaasa amigaateqarneri aamma pissutaaqataasut, Finn Kamper-Jørgensen oqarpoq.
- Sumiiffinni ataasiakkaani pitsaaliuisut ilinniarluarsimasut pisariaqartinneqarput, tassami taakku ilisimassammassuk inuit pissusaat iliuusaallu qanoq allanngortinneqartariaqarnersoq.
Finn Kamper-Jørgensenip eqqaasississutigai suliniutit iluatsittut, soorlu inoorlaat toqusartut ikilisinneqarsimammata, pujortarneq pillugu inatsiseqalersimammat aammalu kinguaassiutitigut atornerluisarneq imminortarnerlu pillugit oqallittoqartalersimammat.
Naalakkersuisunut innersuussutinik qulinik naliliisut siunnersuuteqarput, pingaarnertut siunnersuutigalugu INUUNERITTAp ingerlaannarnissaa. Naliliisut pingasuusut ukuupput: Finn Kamper-Jørgensen, Ilisimatusarfimmi rektori, Tine Pars aamma Kommuneqarfik Sermersuumi pitsaaliuisoq, Line Dalentoft.