Peqqinnissamut qullersat isumaqatigiissut suli atulinngitsoq atorsimavaat

Akissarsititsinerit eqqumiitsut Peqqinnissaqarfiup qullersaqarfiani pisortaq, nakorsaaneq aamma peqqissaasut ningiuunerat atorfimminnit suliunnaarsitaagallarput akissarsiat pillugit isumaqatigiissutit suli naammassillugit isumaqatigiinniutigineqarsimanngitsut atorlugit akissarsititsisoqartarsimammat. Radioaviisip paasisai malillugit akissarsitinneqartut tassaasimapput nunap immikkoortuini nakorsat, nakorsat aamma immikkoortortani peqqissaasut ningiui.
Allattoq Apollo Jeremiassen
marsip 28-at 2012 16:57

Peqqissutsimut Naalakkersuisoqarfimmi pisortap, Ann Birkekær Kjeldsenip manna tikillugu paasissutissiissutigaa, aningaasat akissarsiaritinneqarsimasut suliunnaarsitaagallartut namminneerlutik kaasarfimminnut ikisimanngikkaat uppernarsarsinnaallugu.

Akissarsitsinneqarsimasut ilisimalikkagut tassaapput, Nunatta immikkoortuini nakorsaanerit tallimat, Nuummi nakorsaanerit marluk aamma immikkoortortani peqqissaasut ningiui pingasut.

Peqqinnissaqarfiup nutarterneqarnerata atuutilersinneqarnerani peqqinnissaqarfinni atorfillit taakku 2010-mi suliunnaarsinneqarput oqarfigineqarlutilli atorfitik qinnutigeqqissinnaagaat.

Atorfitilli uterfigeqqikkamikkit taakku akissarsiassaasa isumaqatigiinniutigineqarneri suli naammassisimanngillat. Tamannarpiarlu pissutigalugu Peqqinnissaqarfiup qullersaasa aalajangerpaat, isumaqatigiinniutaasut inerneriumaagaat naapertukannerlugu siumoortumik akissarsitsinneqassasut.

Ajornartorsiutilli qiterpiaa maanna tassaavoq, siumoortumik akissarsitsitsisoqarnerani sulisitsisut, tassa Namminersorllutik Oqartussat ilisimatinneqarsimanngimmata.

Peqqissaasut ningiui eqqarsaatigalugit taakku qaammammut 6.000 koruuninik, 2011-mi ukiakkut ukiup aallartiffianit atuuttumik utertooruteqarput, tassalu maanna paasinarsisumik aningaasanik suli akuerineqanngitsunik utertoorutisiaqartinneqarlutik.

Peqqissaasut isumaqatigiinniutaat aatsaat sapaatip akunnialuit matuma siorna naammassineqarluni atsiorneqarpoq. Isumaqatigiissutip takutippaa, peqqissaasut ningui qaammammut 1.000 koruuninik amerlavallaartunik siumoortumik akissarsitsinneqartarsimasut.

Sapaatip akunnera una qaangiutinngitsoq, siumoortumik akissarsitsitsisimanerup paasiniaavigineqarnera naammassissasoq, Peqqissutsimut Naalakkersuisoqarfiup pisortaata, Ann Birkekær Kjeldsenip nalunaarutigaa.

Radioaviisip ilisimaligaa naapertorlugu, siumoortumik akissarsitsinneqarsimasut tamarmik Nuummi ullumi tusarniaaffigineqarsimapput.

Oqaatigissarvarpulli, paasisavut pisortatigoortumik ullumi uppernarsisinnaasimannginnatsigit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq