Peqqinnissamut naalakkersuisoq: Upernavimmut angalanerit pisariaqanngitsut unitsinneqarnissaat sulissutigaarput
Upernavimmi coronavirusip tuniluutipilunnera oqartussanit akiorniarneqarpoq. Illoqarfiup matuneqarnissaanik Avannaata Kommuniata borgmesterip Palle Jerimiassenip kissaateqarnera Naalakkersuisut taperserpaat.
- Avannaata Kommuniata borgmesteria Palle Jerimiassen oqaluunnikuuara. Isumaqatigalugu paasitippara. Oqartussani coronamik suliaqartut taamatuttaaq Naalakkersuisunut innersuussinikuupput. Partiillu siuttui ippassaq (pingasunngornermi aaqq.) isumasioqatigaakka, taakkulu aamma tapersersuipput. Massakkullu nalunaarusiorneruit aallartisarnikuupput. Piareerpatalu nalunaarutigissavagut, Kirsten L. Fencker Qanoruumi apersorneqarluni oqarpoq
AAMMA ATUARUK Coronap Upernavik matugaa: Soorlulimi Upernavimmi kisimiillunga
Illoqarfiup matuneqarnissaanik Avannaata Kommuniata borgmesterip Palle Jerimiassen kaammattuuteqarpoq.
- Suliffitta ilai inuerukkammik, allaat kolligiani najugallit nunaqarfiinut angerlartittariaqassallugit paarsisussaarukkatsigut, taavalu suliffiit ilai inuttakitsuaraallutik sulillutik, sulisut angerlarsimanerat pissutigalugu, Palle Jerimiassen oqarpoq.
Kikkut tamarmik qanillisimasutut nalilerneqartut
Upernavimmi innuttaasut 1.100-t missaanniittut tamarmik coronavirusertumut qanillisimasutut nalilerneqarput. Tassalu akiuussusersuinerit misissuinerillu unitsinneqarlutik. Nukiit napparsimasunut atorneqarnissaat siunertaralugu taamaaliorlutik Kirsten L. Fenckerip oqaatigaa.
- Upernavimmi tunillanneqarsimasut taama amerlatigitillugit oqaatigisariaqarpoq innuttaasut tamarmik qanigisatut nalilerneqartariaqartut. Taamaatsillugulu peqqinnissaqarfiup innuttaasut tamaviisa misissornissaannut nukissaqanngilaq. Taamaattumik nukiit piusut napparsimasunut atorumallugit taamatut aalajangiivugut, Kirsten L. Fencker oqarpoq.
AAMMA ATUARUK Tunillatsittut nutaat 21-upput, misissortittunulli akissutissat anorersuup kingusinaartippai
Misissortikkumasut itigartinneqartarsimaneri misissorneqassasoq
Upernavimmiut coronavirusimik ersiuteqarlutik napparsimmavimmut misissortikkumallutik saaffiginnittut itigartinneqartarsimanertik pillugu KNR-imut oqaluttuarput.
Taamaattoqartarsimanera misissorneqassasoq peqqinnissamut naalakkersuisoq oqarpoq.
- Naalakkersuinikkut corona akiorniarlugu ersarittupilussuuvoq innuttaasut misissortinnissaminnut periarfissaqassasut. Aammalu nakorsaanerminngaanniit najoqqutassanik nassuiaatinik peqqinnissaqarfinnut tamanut nassiussuisoqarnikuuvoq, tassa peqqinnissaqarfik misissuisassasoq. Taamaattumik taamatut pisoqarsimanera uggornarpoq, taavalu qulaajassallugu misissugassanngorlugu aalajangernikuuarput, naalakkersuisoq oqarpoq.
