Peqqinnissamut naalakkersuisoq: Ajuusaarnaraluarpoq kisianni nukissaqarfiginngilagut

Kalaallit tarnimikkut napparsimasut tamarmik Kalaallit Nunaanni nakorsarneqartalernissaat anguneqarsinnaanngikkallarpoq, taama oqarpoq Peqqinnissamut Naalakkersuisoq Ark’alo Abelsen. Ilanngullugu ajuusaarutigaa tarminikkut napparsimasut amerlagaluttuinnartut Danmarkimut aallartinneqartarnerat.
septembarip 05-at 2008 12:18

- Soorunami naammanginartuunngilaq. Aallartinneqartartut pingasunut immikkoortinneqarsinnaapput, tarnimikkut napparsimasut napparsimaviannut nassiunneqartartut, eqqartuunneqarsimasut misissorneqartussallu kiisalu tarnimikkut napparsimasut imminnut allanulluunniit navianartorsiortitsisut.

- Tarnimikkut napparsimasut ilaat uagut nunatsinni nukissaqarfiginngilagut, taamaattumik Risskovimik isumaqatigiissuteqarpugut. Taama oqarpoq Peqqinnissamut Naalakkersuisoq Ar`kalo Abelsen. Taassuma ilanngullugu eqqaavaa kalaallit tarnimikkut napparsimasut tamarmik Kalaallit Nunaanni siunissami katsorsarneqarsinnaalernavianngitsut.

Dronning Ingridip napparsimmavissuata perorsaaviginiarneqarnerani siunertaanerarpaa, kalaallit Danmarkimi nakorsarneqartartut ikilisinneqarnissaat.