Peqqinnissamut ministeri saaffigineqassaaq
Taamatut inerniliisoqarpoq nunanut allanut ministeri Per Stig Møller folketingip nunarput pillugu ataatsimiititaliaanit ammasumik ullumikkut isumasioqatigineqarmat.
Lars-Emil Johansenip nunarput pillugu ataatsimiititaliami siulittaasutut tikilluaqqusinermini kalaallit oqariaasitoqaat una issuaaffigaa: “Aliortugaq nipangiusimaannaraanni alliartuinnartarpoq”.
Tamatumani B-52-ip 1968-imi Pituffiup eqqaani qaartartorsuarnik sisamanik usilluni nakkarneranut atatillugu apeqquterpassuit tusatsiagarpassuillu innersuussutigai.
Isumasioqatigiinneq nalunaaquttap akunneranik ataatsimik sivisussuseqarpoq, Lars-Emil Johansenillu neriuutigisaatut inerneqanngilaq:
- Soorlu assersuutigalugu qaartartorsuit sisamat plotoniumimik akullit, tassa qinngornernik ulorianartunik akullit taakkua sisamat, timmisartumi usigineqartut, taakkua tamarmik nassaarineqarpat? Tamanna suli assortuussutaavoq. Aamma immap naqqaniittoqarpat, suut qanorlu annertutigisut suli immap naqqaniippat? Aamma ullumikkut mingutsitsineq qanoq annertutigiva? Aamma akissutissarsinngilarput suli inuit qanoq sunnerneqarnersut, taamanikkut aamma ullumikkut. Tassami plutoniumeqarsimappat, plutoniumip naleerukkiartortarnera ukiut 24.000-it sinnerlugit sivisussuseqarpoq. Taamaattumik plutoniumeqarsimaguni mingutsitsineq ullumikkut suli ingerlavoq. Taamaattumik isumaqatigiippugut ingerlaqqittariaqartugut, taavani sulisuusimasut peqatigiiffiat aggersassamaarparput oqaluttuartillugulu. Neriuppunga aamma Avanersuarmi peqatigiiffik nutaaq maannakkut aallartinneqaqqammersoq periarfissaqarfigissallutigu aamma Danmarkimi peqqinnissamut ministeri ataatsimeeqatigisinnaassallutigu, Lars-Emil Johansen oqarpoq.
Aamma Juliane Henningsen pissarsiaqarpallaanngitsutut misigisimavoq.
- Pissutiginerullugu peqqissutsikkut apeqqutit pingaarutillit nunanut allanut ministerip akisinnaanngimmagit. Isumaqarpunga inunnut tunngasut aamma Narsaarsuup nunataanut aamma Thulimi nunamut tunngasunik misissuinerit pisimanngippata, taakkua pingaartorujussuusut pissallugit. Aamma isumaqarpunga Danmarkimi peqqissutsimut ministeri tulliullugu saaffigissagipput, apeqqutitsinnillu akissuteqaqqullugu saaffigissagipput,
Juliane Henningsen oqarpoq.
Ilinniagartooq Svend Aage Christensen Danmarkimi nunanut tamanut ilisimatusarfimmeersoq nutaamik nalunaarusiussaaq. Taassuma pappilissat atugassani ullumikkut aatsaat pissarsiarai, nalunaarusiassanilu qaqugu naammassiumaarnersoq maanna oqaatigisinnaanngilaa.
