Peqqinnissamik sullissineq naammagineqanngilaq

Narsami innuttaasut 50-it tungaanut amerlassuseqarttut peqqinnissaqarfimmi sullissineq naammagiunnaarlugu akerliussutsimik ullumi takutitsipput. Narsarmiu Shila Kleist akerliussutsimik takutitsinermi siunertarineqartoq pillugu ima oqarpoq.

- Nakorsiartarfimmi utaqqinarpallaarunnaarluni tiguneqapallattarlernissaq, ingammik meerartagut kissaruluttut anniaateqartullu tiguneqapallattalernissaat utaqqitinnagit. Utaqqititsinersuaq aqagumullu kinguartitsinersuaq taanna massakkut atuukkami, atoraluttuinnalerami. Shila Kleist, Narsami akerliussutsimik takutitsisut ilaat oqarpoq.

”Meerartagut iluamik misissorneqartarnissaat kissaatigivarput, asuli angerlartiinnarnagit” akerliussutsimik takutitsisut allagartarsuaataasa ilaat taama allaqqasoqarpoq. Niviarsiaraq 10-nik ukiulik sapaatip akunneri marluk matuma siorna inaluaaqqaminik qaartoorluni toqutseqarpoq, tamannalu pinngitsoortinneqarsimasinnaagaluartoq Narsami innuttaasut isumaqarput.

Akerliussutsimik takutitsineq kinguneqarumaartoq, Shila Kleist neriuppoq.

- Neriuppugut peqqinnissaqarfimmi sulineq sukkasuumik ingerlalissasoq, ingammik nakorsiartarfimmi.

Peqqissutsimut naalakkersuisup Agathe Fontainep tusagassiuutinut nalunaaruteqarluni pisumut misiginneqataanini nalunaarutigaa.

- Niviarsiaqqap toquneranut pissutaasut tamakkiisumik qulaajarneqarnissaat uannut pingaartorujussuuvoq. Suliamik ilisimasalinnit naliliisoqartariaqarpoq. Tamannalu ingerlanneqalereersimavoq, naammassinissaalu utaqqiinnartariaqarparput. Peqqinnissaqarfimmi suleriaatsit allanngortinneqarnissaat pisariaqartinneqarnersoq Nunatsinni nakorsaanermut oqaloqatigiissutigerusuppara.

Narsami npparsimmavimmi sulisut, pisumit alianaqisumit attortissimaqisut nalunngilara. Pingaartumik sulisut ataasiakkaat pisup alianaqisup ingerlanerani qanimut sullissimasut. Agathe Fontain ilaatigut taama allappoq.