Peqqinnissamik ingerlatsineq iliuuseqarfigineqassaaq

Peqqissutsimut naalakkersuisup Agathe Fontainip peqqinnissamik ingerlatsivik ingerlanerliortoq sakkortuumik iliuuseqarfiginiarpaa, Nunatsinni innuttaasut taamaalillutik peqqissutsimut oqartussanut tatiginneqqilerniassammata.
Allattoq Elisa Isaksen
oktobarip 12-at 2009 17:16

Sapaatip akunnerata naanerani peqqinnissaq pillugu isumasioqatigiittoqareersorlu, naalakkersuisunut ilasortaq tusagassiortunik katersortitsinermini oqaatigaa, iliuuseqarfiginialikkani tassaasut, seeqqumikkut siffissamikkullu suliaritinniarlutik utaqqisorpassuit kiisalu nappaatit inuunermi pisusilersuutinik pissuseqartut, soorlu sukkorneq aamma aap ingerlaarfiisigut nappaatit.

Peqqinnissamik suliaqartut suliassaqareeraluaqisut, peqqinnissamik ingerlatsivik maani utoqqaat amerliartuinnarnerannit annerusumik suliakkersorneqarpoq. Tamannalu iliuuseqarfigiuminaappoq, utoqqaalli peqqinnissakkut ikiorneqartariaqarput.

Peqqinnissamik ingerlatsivik ukiormanna 1,2 milliardit koruuninik aningaasartuuteqarfiussaaq. Maannali aningaasat innuttaasunut iluaqutaanerunissaat Agathe Fontainip anguniarniarpaa.

Taanna isumaqarpoq tamanna iluarsartuusseqqinnikkut anguniarneqassasoq, tassa Nunarput nunap immikkoortuinut tallimanut aggorneratigut. Taamaalilluni peqqissaaviit annerusut ingerlanneqassallutik, taamalu sulisussarsiorneq sulisunillu tigumminniinnarniarneq pitsaanerulerniassammata. Tamatuma peqatigisaanik allaffissornikkut aaqqissuusseqqittoqassaaq, taamaalilluni peqqinnissamik suliaqartut oqilisaassiffigineqarniassammata.

Aammattaaq suliaritinnerit sivikinnerulersinneqassapput, ullut uninngaffiusut ikilisinneqarniassammata. Tamatuma saniatigut ilaatigut Inuunerittap annertusarneratigut napparsimalersitsinaveersaarneq annerulersinneqassalluni.

- Inuunerittami anguniarneqartut malinnissaat pingaaruteqarpoq. Taamaalillutami Nunatsinni innutaasut atugarissaarnissaat qulakkeersinnaassagatsigu taamaalillutalu peqqinnissamut aningaasartuutit aqussinnaaniassagatsigik, Agathe Fontain tusagassiortunik katersortitsinermi ullumi taama oqarpoq.