Peqqinnerulernissaq suliniutigineqalerpoq

februaarip 01-at 2005 16:34

Nunatsinni innuttaasut inuunikippallaarput, inuunertussuseq agguaqatigiissillugu innuttaasut ukiut 65-iinnaat inuuffigisarpaat. Tupatornerup kingunerisaanik nappaatinut inuiaqatigiit ukiumut 220 milliuuni koruunit aningaasartuutigisarpaat, inooriaatsip kingunerisaanik, soorlu sukkornermik puakkullu kræfteqalertarnermiik napparsimalersartut amerliartuinnarput. Tamanna allanngortittariaqarpoq, peqqissuunissarlu pillugu oqallittoqarnerusariaqarpoq.

Taamaammat peqqissutsimut naalakkersuisoq innuttaasut peqqissuunissaannut pilersaarusiamik aallartitsisimavoq. Suliniarnermi tunaartarineqartussamik issittumi nappaatit pillugit proffessori Peter Bjerregaard atuakkiorsimavoq, taaguuserlugu ”Innuttaasut peqqissunissaannut suliniut”. Atuagaq pineqartoq pinaveersaartitsinermi peqqissuunissallu siuarsarneqarnissaanut naalakkersuisut suliniarnerminni atorniarpaat.

Tunaartarineqartussaq pillugu Ilaqutariinnut Peqqissutsimullu naalakkersuisoq Asii Chemnitz Narup ima nassuiaavoq:

- Taassuma ilisimatuussutsikkut ilisimariikkavut nunatsinni peqqissutsimut tunngassuteqartut eqikkarlugillusooq atuakkami saqqummersippai. Peqqissutsikkummi ajornartorsiuterpassuaqarpugut, katsorsaanerinnarli isumalluutigiinnarnagu annertuumik pinaveersaartitsinerup tungaatigut siuarsaaqataaniarpugut, Asii Chemnitz Narup nassuiaavoq.

Suliniummi aallartinneqartumi innuttaasut peqataanissaat pingaartinneqarpoq, 2006-miillu 2012-ip tungaanut pinaveersaartitsinerit nalilersuinerillu ingerlanneqartassasut peqqissutsimut naalakkersuisoq oqarpoq.

- Tassa innuttaasut peqqissuunissaannut suliniutit ilusilersornissaannut sulinerput maanna aallartipparput, innuttaasullu ilaseraavut peqataaqqullugit, nalunngilarpummi inuppassuit nuannersunik takorluugaqartut kissaateqarlutillu. Taassuma saniatigut atorfilli immikkullu ilisimasallit suleqatigiikkuutaarlutik sullipput. Taamaalilluta aasap tungaanut suliniutissaviit qanoq ittuunissaasa aalajangersarnissaanut tunngavissarissaassalluta, Asii Chemnitz Narup nassuiaavoq.

Aamma oqarpoq innuttaasut peqqinnerulernissaat siunertaralugu illoqarfinni assigiinngitsuni innuttaasunik ataatsimiisitsinerit aasap ingerlanerani aallartinneqassasut.