Peqqinnerulernissamut suliniutit aallartilerput

Peqqinnerulluta sivisunerusumillu inuusinnaasariaqarpugut, taama peqqissutsimut naalakkersuisoq Asii Chemnitz Narup isumaqarpoq.

Taamaammat innuttaasut peqqissuunissaannut pilersaarusiamik aallartitsisimavoq 2006-miit 2012-ip tungaanut atuuttussamik.

Suliniutit aallartinnissaanut tunngavissat assortoruminaatsutut oqaatigisariaqarput.

Nalunaarusiaq malillugu pilersaarusiamut tunngavissiisup takutippaa kalaallit peqqissutsimikkut inissisimanermikkut inuunikippallaartartut. Meeqqat inuusuttullu akornanni toqusartut amerlavallaarput, imminorlutik toqusartut, kræftimik napparsimalersartut ajutoornerit, imigassartorpallaarnerit, kissaatiginngisamik naartulertarnerit, kinguaassiutitigut nappaatit, kigutiluppallaarnerit kiisalu pualavallaalertarnerit sukkornermillu napparsimalersartut amerliartuinnarnerinik takussutissat.

Pilersaarusiap suliarineqarnissaanut isumassarsiaq, ajornartorsiutinik taaneqartunik annikillisaasussaq silaannarmit asuli tigusaanngilaq. Nunani Europap kitaanittut amerlanerit peqqissuunissamik pilersaarusiamik peqarput, naak pissutigineqarsinnaasut assigiinngissinnaangaluartut.

Pissutsit piviusut pillugit naalakkersuisoq isumaqarpoq, innuttaasut peqqissuunissaannut pilersaarut siunertanik toqqakkanik, pinaveersimatitsinissamik peqqinnerulernissamillu suliniuteqarnissamik imaqassasoq, innuttaasullu peqqissuunissaannik siumut isigisumik sulineq ingerlanneqassasoq, suliniutigineqartussanullu piviusorsiortumik pilersitsisoqassasoq.