Peqqinneq pillugu oqaatsit nutaat
Atuagaq taaguusersuutinik imalik Oqaasileriffiup suliarisimasaa ullumi saqqummersinneqarpoq. Taaguusersuutit peqqinnissaqarfimmi sullissinermi atorneqartussaapput, innuttaasullu pitsaanerusumik kiffartuunneqarnissaat anguniarneqarpoq.
Oqaatsit, imaluunniit taaguusersuutit, 3600-t missaaniittut saqqummersinneqarput, atuagarlu 200-t sinnilaannguarlugit qupperneqarpoq.
Peqqinnisamut Naalakkersuisoq Asii Chemnitz Narup pingaaruteqarnerarpaa kalaallisut taaguusersuutit ineriartortittuassallugit.
- Suleqatigiit assigiimmik oqaaseqarlutik aallaaveqarpata, taava suleqatigiinneq pitsaasoq tunngavissinneqarsinnaavoq, Asii Chemnitz Narup oqarpoq, nangillunilu: - Qularinngilara innuttaasunut kiffartuussinermi iluaqutaassasoq, sullissinermi oqaatsit soorunami pingaaruteqaqimmata. Taaguusersuinerit aalajangersimasut atorneqarnerini aamma paatsuunganerit annikillisarneqarsinnaassammata, Peqqinnissamut Naalakkersuisoq oqarpoq.
Atuagaq 1500-nngorlugu saqqummersinneqarpoq.