Inuussutissarsiornermut naalakkersuisoq Johan Lund Olsen nerisassat peqqinnanngitsut akitsuuserneqarnissaannik isummamigut taperserneqarpoq. Naalagaaffiup peqqissutsimut pisortaqarfianit nunatsinni innuttaasut peqqinnerulernissaannik misissuisoq ilisimatooq Peter Bjerregaard isumaqarpoq nerisassanik peqqinnanngitsunik akitsuusiineq piumarpiarunnaarnerannut aqqutaalluarsinnaasoq.
- Isumaqarpunga aalajangersimasumik toqqaanikkut tamanna aqqutissaasinnaasoq, soorlumi imigassaq pillugu akitsuusiisimaneq iluaqutaasimasoq, aammalumi tupanut tunngatillugu, Peter Bjerregaard oqarpoq.
Ukiut qulit ingerlaneranni arnat pualavallaalertarnerat marloriaatinngorsimavoq, angutinilu aamma tamaappoq. Inuusuttut tallimaagaangata ataaseq pualavallaartarpoq; mamakujunnik sodavandinillu atuineq sukkaqisumik annertusiartortarpoq.
Atuisartut siunnersuisoqatigiiffiata avataanit nunatsinnut nioqqutissanik sukkulinnik eqqussuineq misissorsimavaa, naatitanillu eqqussuinerup sukkunik eqqussuineq missilioraa misissuinerup takutippaa. Tassa inummut ataatsimut ullormut 100 gram taakkuninnga tamannit immikkut, nerisat iluameersuunissaannik ilisimasut oqaatigisaannit marloriaammik pingasoriaammilluunniit sukkoqarnerusoq nunatsinnut tikisitaasarluni, naatitanilli tikisitat pisariaqartitanit en sjettedeliinnaq tikisinneqartarluni.