Peqqarniisaarniatut pasisat tigusarineqarput
Politiit isertortukkut paasiniaasartuisa PET-p FBI-illu angutit marluk taakkua tigusarineqanngikkallarmatali ukiup ataatsip missaani alapernaarsugarisimavaat. Angutip aappaa Danmarkimut marloriarluni tikeraarsimavoq, PET-kkullu nalunngilaat angut taanna Al-Qaidamut sakkulersorlutillu peqqarniisaarniartartunut allanut atassuteqartuusoq. Angutit marluk 48-nik 49-nillu ukullit oktobarip pingajuanni arfineq-pingajuannilu tigusarineqarput. Paasiniaasartut oqarnerat malillugu angutit Københavnimi Århusimilu aviisip allaffiisa, kulturimut tunngasunut aaqqissuisup Flemming Rosep titartaasartullu Kurt Westergaardip saassunneqarnissaat pilersaarutigisimagaluarpaat. Sakkut tigumiartakkat qaartartullu nunami allamiut pisarnerattut atorneqarnissaat pilersaarutigineqarsimagaluarpoq. Politiit isertortumik paasiniaasartui ullumi tusagassiortunik katersortitsipput. Pisortaat Jacob Scharf oqarpoq:
- Danmarkimi peqqarniisaarniat saassussinissaat PET-p FBI-illu isumaat naapertorlugu tassuuguinnaq pisussatut isikkoqanngilaq, peqqarniisaarniarnissamulli pilersaarutinut atatillugu maannakkorpiaq tigusarinninnissaq pisariaqarluinnarsimalluni, peqqarniisaarniarluni saassussinissatut pilersaarutip naammassineqarnissaanut navianartorsioratarsinnaaneq annikillisinniarlugu. FBI, PET kiisalu nunani allani isertortumik paasiniaasartut arlaqartut paasiniaaqqissaarnissaq ingerlateqqissavaat sioorasaarisimaneq akiorniarlugu peqataasullu paasiniarniarlugit. Tamatumunnga atatillugu arlallit tigusarineqarnissaat, parnaarunneqarnissaat inatsisitigullu malersorneqarnissaat pinngitsoorneqarsinnaanngilaq.
