Peqqarniisaarniat danskinut attuumassuteqarput
Canadami peqqarniisaarnianik ippassaq tigusarinnissimanermut atatillugu, paasineqarpoq peqqarniisaarniaqatigiinnut Glostrupimeersunut peqqarniisaarniaqatigiit Canadameersut attuumassuteqartut.
Tallimanngormat arfininngormallu Canadami politiit peqqaarniisaarniaqatigiinnik 17-nik Ontariomi tigusarinnipput, tusagassiortunullu katersortitsisoqareersorlu tusagassiutit allapput, peqqarniisaarniaqatigiit tigusarineqartut peqqarniisaarnianut allanut attuumassuteqartut, ilaatigut USA-mi Tuluit nunaanni, Bosniami, Danmarkimi, Bangladesh-imi Sverigimilu peqqarniisaarniaqatigiinnut.
Bosniami tigusarinnissimanermi angut danskeq Tyrkiiamiunit kingoqqisoq tigusarineqarpoq, allalu Svenskeq Serbiamiunit kingoqqisoq tigusarineqarluni.
Nunarsuarmi peqqarniisaarniaqatigiit suleqatigiit tigusarineqaqattaarnerini paasineqarpoq, USA-mi Washington sumiiffiit arlalissuit tusaamaneqarluartut saassunenqarnissaanut piareersartoqarsimasoq. Danmarkimilu tigusarineqartut akornanni paasineqarpoq, internettikkut attaveqaqatigiinneq peqqarniisaarniaqatigiinni atorluarneqartarsimasoq.
