Peqqarniisaarniartartutut pasineqartut tigusarineqarput

Tuluit politiivisa inuit pingasut, juulimi 2005-imi annertuumik peqqarniisaarniartoqarnerani peqataasimasutut pasineqartut ippassaq unnukkut tigusarisimavaat.

Taakku tuluit politiivinit peqqarniisaarniarnermik suliaqartunit maanna killisiorneqaleruttorput.

Qaartartumeerisoqarnerata kingorna Tuluit politiivi siullermeerlutik inunnik arlalinnik aatsaat tigusarinnipput. Manna tikillugu tuluit politiivi isumaqaraluarput inuit sisamat 2005-imi imminut toqoriaatigalutik qimuttuitsut sullorsuartigut aqqutaanni bussimilu qaartartumeerisut, inunnillu 52-inik toqutsisut, tassaasimassasut peqqarniisaarniat suleqatigiit ikittuinnarnik inuttallit. Maannali politiit taamaassorinninnertik allanngortissimavaat angutillu inuusuttut pingasut ippassaq tigusaralugit.

- Tigusarinninneq pivoq Tuluit Nunaata avannarpasinnerusortaani Manchesterimi Leedsimilu. Angutit marluk timmisartumut Pakistaniliartumut ikiartulersut tigusarineqarput, pingajuallu nalunaaquttap akunneri arlalialuit qaangiummata angerlarsimaffimminiittoq tigusarineqarpoq.

Angutit taakkua pingasut maanna Londonimi parnaarussiviit nakkutigilluagaanerpaartaani tigummineqarput tassanilu killisiorneqassallutik.

Oqaatigineqarpoq 2005-imi peqqarniisaarniarlutik qaartartumeerisunut sisamaasunut aningaasatigut ikiuussimassagunartut innisimatitsisimassagunartullu. Aammali qaartartumeerinissap pilersaarusiorneranut peqataasimasinnaanerat pillugu killisiorneqassapput.

Tigusarineqartut politiinit piffissami sivisuumi alaatsinaanneqarsimapput tigusarinninnerlu eqqissisimasumik ingerlanneqarsimasoq oqaatigineqarpoq.

Skotland Yard-imit oqaatigineqarpoq maanna misissueqqissaarnissamut killisiuinissamullu piffissaq sivisunerusoq atortariaqassagitsik.

Tuluit peqqarniisaarniarnermut akiuiniarlutik inatsisaat naapertorlugu tigusarineqartut politiinit ullut 28-t tigummigallarneqarsinnaapput tamatumalu kingorna unnerluussisoqassaaq imaluunniit iperagaatinneqassallutik.