Peqqarniisaarniartarsimasoq iperagaangallartussanngorpoq

Tysklandimi eqqartuussiviit ilaat aalajangerpoq qunutitsillutik saassussisaqattaartartuni Rote Arme Fraktion-ini siuttuusimasut ilaat misiligummik iperagaatinneqassasoq.

1982-imi Brigitte Mohnhaupt toqutsinerit, inunnik aallarussinerit pinerluutillu allat 70-ikkunni pisimasut pissutigalugit inuunini tallimariarlugu ukiullu 15-it, parnaarussassatut pineqaatissinneqarpoq. Maanna ukiut 24-t parnaarussaareerpoq malittarisassallu malillugit misiligummik iperagaatinneqartussaalluni.

Stuttgartimi eqqartuussiviit qullersaaniit saammaassineq pineqarani, malittarisassalli naapertorlugit Brigitte Mohnhaupt misiligummik iperagaatinneqassasoq erseqqissarneqarpoq, aammattaaq innuttaasut isumannaatsuunissaat isiginiarneqarsimasoq oqaaseqartitap oqaatigaa.

Misiligummik iperagaasussap inoqatiminut navianartorsiortitsinnginnera tusagassiortunut nalunaaruteqarnermi erseqqissarneqarpoq. Tassami 70-ikkunni taama isigineqaraluarpoq, tassa taamanikkut qunutitsillutik saassussisaqattaartartunut, Rote Arme Fraktionimut siuttunut ilaagallarmat. Taakkua qunugineqaqaat ersigisaallutillu, Tysklandimi inunnik pingaarutilinnik saassussisaqattaartaramik.

Suliniarnerminni isummat tunngavigisaat tassaapput sakkulersorluni pissaanermik tigusiniarneq ingasattajaarlunilu saamerliuniarneq.

Taamanikkut toqutaasa ilagaat Tysklandimi naalagaaffiup eqqartuussissuserisua suliffissuaatillillu kattuffianni siulittaasoq. Tamakkua saniatigut Brigitte Mohnhaupt unnerluutigineqarpoq peqataaffigisimagai Amerikamiut sakkutuuisa Europami qullersaanut toqutseriaraluartut, inunnik tigusarinninnerit, aningaaserivinnut sakkulersorluni ujajaanerit sakkulersorlunilu saassussinerit arlalissuit. Tamakkua tamarmik Amerikamiut nunasiaateqarniarnerannut aningaasaatilissuillu naqisimanninneranut akerliuniarluni iliuuserineqartarput.