Peqqarniisaarniarneq pillugu ilisimannittoq killisiorneqarpoq

decembarip 21-at 2006 10:47

Peqqarniisaarniarneq pillugu suliaq Glostrupimeersoq – tassa Bosniami suliamut attuumassuteqartumi, danskit naalagaaffiannut innuttaasumik peqqarniisaarniarnissamik pilersaaruteqartumik unnerluussinertaqartumi – ilisimannittut ilaat pingaarutilik ullumi killisiorneqarpoq.

Taanna tassaavoq AA – Bosniamiu 21-nik ukiulik.

AA oqaluttuarpoq inuusuttut marluk – danskeq svenskerlu – maanna Bosniami tigummineqartut, qaartartuuteqartut politiillu naapertorlugit suliassami pingaarnertut inissisimasut, angalanissaannut pappilissanik pas-inillu ikiorsimallugit.

Nukappiaq, Bosniamiutut oqalussinnaanini nunamilu pissutsinik ilisimasaqarnini pissutigalugit ikiortigissallugu piukkunnarluinnartuuvoq. Ullumili eqqartuunneqarnermini sunarpiaq pineqarnersoq paasisimanngitsutut ippaa.

Nukappiaq sunnerneqarsimagunarpoq imaluunniit pinngitsaalillugu iliuuseqartinneqarsimagunarluni.

Ilisarisimasaa qanittukkut oqarpoq AA musliminit ingasattajaarnianit sunnerniarneqarsimassasoq. Ukiuni kingullerni qulini ilisarisimasaata oqaatigaa AA oqalliseqatigalugu malunnartartoq, nutaarpassuarnik isummersortartoq nammineq isummiussarigunanngisaminik, tigusaanissanilu sioqqullugu qarsupittumik pissusilersortarsimasoq. Taamaattumik ilisarisimasaa isumaqarpoq AA sunnerniarneqarsimassasoq.