Peqqarniisaarnianut sillimanissaq nunatsinni aamma kissaatigineqarpoq

CIA-p peqqarniisaarnianik tigusanik timmisartukkut nunatsinni timmisartoqarfinnut akunnittarsimaneranik tusagaq tunngavigalugu, Folketingimut ilaasortap Lars-Emil Johansen-ip peqqarniisaarnianut sillimanissamik misissuisoqarnissaanillu maanna statsministerimut Anders Fogh Rasmussen-imut apeqquteqarluni ujartuivoq.

-Ileqquuvoq Savalimmiut nunarpullu peqqarniisaarnianut suliniuteqarnermi eqqaaneqartannginnerat. Eqqarsaatigigaanni naalagaaffimmut ilaasugut tamanna naammaginanngilluinnarpoq. Danmarkilli illersorneqarnissaa pineqaraangat taamaallaat Nørreportip eqqaalu kisimik eqqarsaatigineqartarput, Lars-Emil Johansen oqarpoq.

Lars-Emil Johansen-ip apeqquteqarnerminut tunngavigivaa, CIA-p nunatsinnut nunnittarsimanera isortortumik sorsunnermut ilaasoq, taamaammallu peqqarniisaarfigitinnissaq suli annertunerusinnaasoq.

-Nalunngilara uppernarsineqanngitsoq, ilimanarluinnarporli nunnittoqartarsimanissaa. Qanoq pisoqassava peqqarniisaarniaq timmisartoq tiguassagaluaruniuk, folketingimut ilaasortaq aperaaq.

Folketingimut ilaasortap Kuupik Kleist-ip ippassaq danskit angallannermut ministeriaqarfianut CIA-p nunatsinnut nunnittarneranut tunngasunik aamma apeqquteqarpoq.