Peqqarniisaarnernut Hans Enoksen misiginneqataavoq
Allattoq Carla Davidsen
juulip 08-at 2005 05:29
Naalakkersuisut siulittaasuat, Hans Enoksen, tuluit ministeriunerannut Tony Blairimut misiginneqatiginnissummik allagaqarpoq.
London-imi ippassaq peqqarniisaartoqarnerata kingunerisaanik taama pisoqarpoq.
Hans Enoksen misiginneqatiginnissummini ilaatigut allappoq, Naalakkersuisut kalaallillu inuiaat sinnerlugit London-imi inunnut sussuteqanngitsunut inuiannullu kikkuusinnaagaluanut peqqarniitsuliornerit assuarigini.
Aamma allappoq, eqqissinermut, kiffaanngissuseqarnermut demokratiimullu kalaallit tunngaviusumik isiginnittaasaat erligiuassagipput aammalu tamanna ajugaajuaannassasoq.