Peqqarniisaarluni saassusseriaraluarneq iluaqutissanngoriataarpoq

Peqqarniisaarniat aamma peqqarniisaarnianut allanut ulorianaateqarsinnaapput, tassami USA-mi Nigeriamiup juullip ulluani amerikamiut timmisartuannik qaartitseriaraluartup nammineq ulorianaatini isertuanngilluinnarluni oqaluttuarilermagit. CNN-imi tusarfik naapertorlugu Umar Farouk Abdulmutallab-ip Al Qaidamut attuumassuteqarnini pillugu paasissutissat amerlaqisut tunniuppai. Taakkua amerikamiunik akisillutik iliuuseqalersitsisinnaapput, tamannalu Det Hvide Husimi inuit oqarnerat naapertorlugu peqqarniisaarniarnerit allat pinngitsoortinnerannik kinguneqareersimalluni. Angutimmi qaartartumeereriartup ilaqutaasa ilai Amerikamut timmisartuunneqarput, Amerikamilu taakkua angut inuusuttoq qularunnaarsinniarlugu taanna naapertuilluartumik pineqarumaartoq, taamaalillunilu angut taanna paasissutissanik tunniussuilerluni. Imminnut toqoriaatigalutik peqqarniisaarniartartut ilisimaneqartut allat assigalugit Nigeriamiup inuusuttup inuunerani nalornineq kiserliornerlu malunnaqaat, Al Qaidallu nalornineq iluatsitseqaluni nunanut killernut uumissuinermut saatittarlugu. Kisiannili tassa tamatumuuna peqqarniisaarniaq aniguivoq, USA-lu maanna akisilluni inuusuttoq tapersersorniarlugu neqerooruteqarsinnaalerluni, taamaalillutillu peqqarniisaarniat Yemeniminngaanneersuussagunartut piffissami qaninnermi misissornerusariaqalerlutik.

Amerikami politiit isertortumik paasiniaasartut FBI angutip ilaqutaanik USA-liaassipput killisiuinerni ikiorteqarumallutik.