'Peqatigisat aallakaalermata usornaraluaqaat'

1960-70-kkunni meeqqat Danmarkiliartussat ilai angajoqqaaminnit itigartinneqarlutik atuariartunngitsoortarput. -Taamanikkut siunissarput nammineq naalagaaffiginngilarput, itigartitaasut ilaat oqarpoq.
marsip 16-at 2010 16:24

Sinnattut eqquutinngitsut ullumikkumut uggorisarpakka, Hans Kreutzmann Kangaamiuneersoq angajoqqaaminit Danmarkiliarnissaminut itigartinneqarsimasoq oqarpoq.

-Angajoqqqaannit itigartitaavunga, ilakka angajukka tamarmik atuartuupput taamaammat immaqa uanga ikiortissamittut tigusimavaannga. uangarpiaq sooq pinerpoq, oqarpoq.

Peqatigisani assut usorisimagaluarpai.

-Soorunami siunertaqareernikuugaluarluni eqqarsarnarpoq, nuanniitsorsuuvoq taamanikkut atuarusukkaluarluni.

Siunissamut anguniagassatut siunniussani aallartitaannginnermigut annaasimallugit oqarpoq.

- Taamanikkummi ilinniagaqassagaani Danmarkiliaqqaarluni aatsaat ilinniartoqarsinnaavoq. Uanga takorloorsimagaluarpara soorlu timmisartortartup tungaanut, timmisartunik soqutigisaqarlunga arlaanik anguniagaqarusunnissara una siunertarinerullugu timmisartortartoq taava taanna angusinnaassanngikkuku oqaatsit assigiingitsut sapinngisamik amerlasuut ilikkarniassallugit, Hans Kreutzmann oqarpoq.

Piumassuserinngisamillu atuariartunnginnerup kingunerisaanik piviusoq sinnattuniit allaanerugaluaqaaq.

-Peqatigisat aallakaalermata usornaraluaqaat. Soorunami ugguartarpunga ilaanni, kisianni aamma atugarisimasakka eqqarsaatigalugit ugguaannartariaqanngitsutut imminut misigisarpunga, aamma inuussutissarsiorneq tassami aalisarneq piniarnikkullu aamma atukkat nakkaannarfigisimavakka aammalu atorlugit nuannarilersimallugit, massakkut Kangaamiuni Illu Sullivimmi nakkutilliisuuvunga. Ilaanneeriarlunga suu, kamassimalaarnerit pingaartumik kisimiilluni eqqarsaatit qaffakaaleraangata takkuttaraluarput kisianni annertunerusumik tigusariaqanngillat angusinnaajunnaareeratsigit, Hans Kreutzmann Kangaamiuneersoq oqarpoq.

Ilaqarpullu aamma namminneq piumassutsiminnik uniinnarsimasunik. Katrine Manassen Nanortallip eqqaani Aappilattuneersoq uniinarsimavoq.

-Ningiornut najugaqarama perorfigigakku utoqqalinera pillugu aamma ikiorusullugu uniinnarpunga, naapitaqarlungalu aamma aappassannut qimanneq ajulerakku.

- Ilaatigut ugguartarpunga soorlikiarmi, ilinniagaqarusussagaluarpunga, atuarnerma ingerlanerani toqqagaqarsimassagaluarpunga, kingullermik atuarama barnemedhjælperske-mut ilinnialaartaraluarpunga, Katrine Mannasen Aappilattuniit oqarpoq.