Peqatigiinniat atuakkanik agguaaniarput

Tamanna Nunatsinni Peqatigiinniat Kattuffiata ukiumoortumik ataatsimeersuarnerani saqqummerpoq.

Atuagaq 'Inuiaat inissisimanerat' meeqqap pinngornerminiit ajunngitsumik inuttut ineriartussaguni toqqissisimalluni atugarissaartinneqarlunilu alliartornissaata pingaaruteqartuuneranik imaqarpoq, tarnillu pissusaanik ilinniarsimasumit Else Poulsenimit atuakkiarineqarluni.

Taanna Peqatigiinniat Kattuffianit qinnuigineqarsimavoq atuakkioqqullugu apeqqut 'Inuiaat Kallaallit tarnikkut sullissinermi siunnerfiit suut tamanut iluaqutaanerusinnaappat?' tunulequtaralugu.

Atuagaq assigiinngitsunik anersaakkut tarnikkullu suliniutaasinnaasunik imaqarpoq, atuakkiortullu oqarnera malillugu, taakkua ulluinnarni inuunermi atuartussanit malinneqarpata, tamanna Nunatsinnut iluaqutaalluni nukittorsaataassaaq.

Peqatigiinniat 2008-mi ukiut 100-nngortorsiorlutik nalliuttorsiorneranni, Else Poulsen qulequtaq pillugu oqalugiarpoq.

Peqatigiinniallu oqalugiutip imaa inuiaqatigiinnut pingaaruteqarluinnartutut nalilerpaat, siulittaasumillu Magnus Larsenip naqiterisitsisarfia suleqatigalugu, Else Poulsen atuakkiortillugu. Maannalu atuagaq 10.000-nngorlugu naqinneqareersimalereerpoq ukiullu ingerlanerani akeqanngitsumik nuna tamakkerlugu illunut agguaanneqassalluni.

Kommunit sisamaasut atuakkat agguuaannissaanik isumaginnittuuniarlutik akuersereersimapput.

Peqatigiinniat Kattuffiata ukiumoortumik ataatsimeersuarnerani Magnus Larsen siulittaasutut 13-issaannik qinigaaqqippoq.