Peqatigiillutik nukissiornialerput
EU, USA, Kina, India, Japan, Korea Kujalleq aamma Rusland peqatigiillutik siunissami nukissiuutissamik ineriartortitsinissamut suliniuteqalerput, peqatigiilluni nukissiornermik taaneqartumik.
Nunat Frankrigip kujataani misiligummik nukissiorfiliorniarput tassanilu nukissiuut akikitsoq isumannaatsorlu misilerarneqassaaq.
Peqatigiilluni nukissiornikkut atomip nukinga atorlugu nukissiorfittulli qiterpiaatigut aattoornissaq taamalu Tjernobyl-imisut ajutoornissaq pinngitsoorneqarsinnaavoq.
Isumassarsiami seqernup nukimmik pilersitsisarnera issuarniarneqarpoq. Iluatsissappat nukissiuut sivisuumik pigineqarsinnaasoq avatangiisinullu mingutsitsinngitsoq atorneqalersinnaavoq.
Taamaattorli avatangiisit pillugit illersuiniaqatigiit suliniut isornartorsiorpaat, isumaqarlutik nunarsuup kissatsikkiartornerata akiorniarneranut atatillugu allamut saassaasuunerarlugu.
