Peqatigiiffiup Grønlandske Børn-ip issittumi nunat assilianngortinniarpaat
Nunatsinni Danmarkimilu meeqqanik kalaaliaqqanik suliniuteqartut, peqatigiiffiup Grønlandske Børn-ip ukiunik 90-inngortorsiorneranut atatillugu suliniuteqartoqarnerani, meeqqat kalaaliaqqat Aarhusimi najugaqartut, suliniummullu 'Danmarkimi inuuneq pitsaanerusumut' attuumassuteqartut, atuaqatiminnut immikkut misigisaqartitsiniarput.
Aarhusimi meeqqat atuartut atornikunik assigiinngitsunik katersereerlutik, issittumi nunat assilianngorlugit takusassiariniarpaat. Tamassumunnga ikiortigissavaat, DR-ip meeqqanut aallakaatittagaani ilisarisimaneqartoq, Shane Brox. Taanna pappilissat atorlugit qiortaallunilu nipititerisarpoq.
Aarhusimi atuartut takussassiaat, Shane Broximit peqatigiiffik Grønlandske Børn-imut tunissutaavoq, aamma Danmarkimi Nunatsinnilu illoqarfinni allani tallimani taama suliaqarnissat aningaasaliiffigalugit.
Suliat issittumut tunngasut naammassineqariartapa atuarfinni takutinneqassapput, taamaalillutik atuartut angajoqqaavisalu issittoq pillugu ilisimasaqarnerulernissaat siunertarineqarluni, aviisi Aarhus Stiftstidende taama allappoq.
Shane Broxip taama suliaqarnissat arfinillit tunissutigisimavai. Siulleq Aarhusimi maajip 21-ani pissalluni. Taassuma kingorna Københavnimi aggustip 14-iani, Aalborgimi septembarip sisamaani, Esbjergimi septembarip aqqarngani Ilulissanilu suliaqarnissat marluk septembarimi.
Suliniut 'Danmarkimi inuuneq pitsaanerusup' Danmarkimi kalaallit meerartaat, kulturikkut assigiinngissutsit, sumiginnagaaneq oqaatitigulluunniit ajornartorsiuteqarneq pissutigalugu ajornartorsiuteqartut ikiorniarlugit siunertaqarpoq. Peqatigiiffik Grønlandske Børn 2013-imi Danmarkip aningaasartuutissanut inatsisaannut ilanngunneqarpoq ukiumoortumik 6 millionit koruuninik aningaasaliiffigineqartartussanngorluni.
