Peqatigiiffittaassaq Norge pillugu malunnartitsinialersaartoq
Norgep naalagaaffiata tunngaviusumik inatsisaata ukiuni 200-nngortorsiornera malunnartinniarlugu, norgemiut Nunatsinni najugaqartut nutaamik peqatigiiffiliulerput. Tamannalu pillugu unnummut aggersaallutik.
- Kalaallit Norgemut ikinngutaasut piumasut, Norgep Kalaallit Nunaannut sinniisoqarfiata illuutaanut Nuummiittumut ataatsimiigiaqquneqarput, ataasinngorpat apriilip 28-anni nalunaaqutaq unnukkut arfineq pingasup qeqqanut. Taama allappoq Norgep Nunatsinni sinniisoqarfia.
Norgep Nunatsinni sinniisoqarfia peqatigalugu Nunatta Isiginnaartitsisarfia isiginnaagassiamik takutitsissaaq. Tassunga atatillugu norgemiu isiginnaartitsisartoq, Birgitte Grimstad qaaqquneqarsimavoq. Taassumalu isiginnaagassiaa 'Lune Glimt fra Firehundredeårsnatten' isiginnaarneqarsinnaasaaq maajip 17-anni, tassa Norgep inuiattut ullorsiorfiat eqqorlugu. Isiginnaagassiaq takutinneqassaaq, Nunatta kulturikkut illorsuani Katuami. Isiginnaagassiap takutinneqarnerata saniatigut norgemiut ileqqorsuutaannik tusarnaartitsisoqassaartaaq.
