Peqatigiiffik sammisaqartitserusuppoq
Ilulissani silami sammisassaqartitsivimmik sananissaq Qaasuitsup Kommuniani kissaatigineqarpoq. Kommuuniilli aningaasarliornera pissutigalugu suliniut kinguartinneqartarpoq. Tamannali uniffiginagu nammineq piumassutsimik suliartut nanginniarpaat.
Peqatigiiffimmik aallartitsiniartuuvoq kommunabestyrelsemi ilaasortaq Palle Jeremiassen qangali kissaatigineqartup piviusunngornissaanik sulissuteqarusuttoq.
- Nammineq piumassuseq atorlugu maani illoqarfitsinni meeqqanut inuusuttunullu pinnguartarfimmik sammisassaqartitsivimmik pilersitserusuppugut Kulturimut illorsuatta Sermermiut eqqaani, Palle Jeremiassen tusagassiutinut nalunaarummini allappoq.
Suliniummik aallarnissaasut siunniuppaat kissaatigisap 2012-mi aasakkut piviusunngornissaa.
- Sammisassaqartitsiviup illoqarfiup qeqqanut inissinneqarsinnaanera siunertaavoq, timersortarfiup Sermermiullu eqqaanni, taamaasilluni kikkunnit tamanit tikikkuminartuullunilu atorneqarsinnaanera anguneqassammat, Palle Jeremiassen oqarpoq.