Peqatigiiffik nutaaq aallartippoq
Siunnersuinikkut paasititsiniaanikkullu tamanna pisassaaq, politikerit isumasiorneqartassapput, aamma angerlarsimaffeqanngitsut atornerluisullu mininneqassanatik.
- Kalaallit sorpassuartigut qangali puiorneqartartut naluneqanngilaq - sulilu taamaappoq - tamannali amerlasoorpassuit nassuerutigerusunneq ajorpaat, peqatigiiffik nutaaq allappoq, atorfippassuillu pilerinartut kalaallinik inuttaqarsinnaasut qallunaanik inuttaqartinneqartarnerat ilaatigut aamma tikkuarlugu.
Aatsitassanut Ikummatissanullu suliffeqarfissuit aamma puiorneqanngillat. Kalaallit Nunaata pisuussutaasa atorluarneqarnissaat Siunissaq Neriuummit aamma sulissutiginiarneqarpoq.
- Pisuussutit tamakku Kalaallit Nunaanniiginnarnissaat, kalaallinullu iluaqutaanissaat, uatsinnut pingaaruteqarpoq, Afrikami sumiiffippassuarnitut pisoqassanngilaq, soorlu indiamiut kinamiullu suliffeqarfiuterpassui tamaani pisuussutinik atornerluipput, aningaasarsiorluarlutik, naak taamaattussaanngikkaluartoq, peqatigiiffimmit allapput.
Siunissaq Neriuummi siulittaasuuvoq Helene Dalager, siulersuisunilu ilaasortanut ilaapput Johannes Nørgaard aamma Abigail Sortberg.