Peqatigiiffik NNN 2008 pilersinneqaqqammerpoq

Nunatsinni nappaat toqqutaasartoq anneq tassaavoq kræfti. Neriuffik aatsaat taama suliassaqartigilerpoq. Inatsisartulli sukkanerusumik sulisariaqarnerarneqarput, pingaartumik ilaqutaasut eqqugaasarmata. Qanigisaq Danmarkimut katsorsartikkiartortariaqartillugu ilaqutaasoq ulluni pingasuinnarni akiliunneqartarpoq.

”Neriuffik” aamma aalajangersimasumik illussaaleqivoq.

Peqatigiiffik ilaqutariinnik oqilisaassiniartussaq nutaaq taaguutilik – NNN 2008 – Nunarsuaq Nunarsuutillugu Napparsimasoqartuassaaq – ilaatigut aningaasanik katersiniartartussaq pilersinneqaqqammerpoq.

Agnetha Petersen Nuummeersoq ima nassuiaavoq:

Aallartippugut, pisariaqarami aamma nappaassuaq taanna kræfti taama annertutigisoq ukiut ingerlaneranni saqqumilaarpianngitsorlu. Takutitsisinnaassaasut massakkut. Suliniut oqimaakkaluarpoq, kisianni neriuppunga inunnik ikiuilluartoqarumaartoq tapersersorneqarlunilu. Annertorujussuugamimi suliaq, kisianni nuannerpoq taama takutitsisinnaalluni, Agnetha Petersen oqarpoq.

Agnetha Petersenip uia siorna kræftimik nappaateqalerpoq, Danmarkimilu katsorsartinnera ukiup affaanik sivisussuseqartussaasimavoq. Tappavaniinnerminni arfineq-pingasoriarlutik qulingiluariarlutilluunniit sumut tamaanga nuuttaqattaartariaqarsimapput. Inimillu iluatsitsilluni qaammatini pingasuni attartugassarsisimavoq, qaammatini marlunni marluullutik najorsinnaasaminnik.

Peqatigiiffittaap NNN 2008-p Neriuffik-iup Nuummi immikkoortortaqarfia peqatigalugu Namminersornerullutik Oqartussat allaffeqarfiata silataani nappaassuaq pillugu paasisitsiniaatigalutik ullaarli tuperput. Neriuffik Nuummi siulittaasoq Susanne Kreutzmann Malmros aporfissaasartut pillugit ima nassuiaavoq:

- Ilaqutaasut iluamik nalunaarfigineqarneq-ajorput, qanoq sivisutigisumik Danmarkimi ineqartinneqarsinnaanersut. Danmarkimut aatsaat pigaangata ilisimatinneqartarput ulluni pingasuinnarni inissaqartinneqarlutik.

Susanne Kreutzmann Malmros aamma oqarpoq ilaqutaasut napparsimasup ullorparpassuarni misissugariteriarluni suliaritittussanngoraangat sivisunerusumik uninngassalluni, napparsimasumik ilaqutaasumillu nooqattaartitsineq aallartittartoq.

- Nooqattaartitsinerup pinaveersaarnissaa inatsisartunut tapersersorneqarniassagatta oqariartuutigaarput.

Nooqattaarnerlu ilumut artukkiisarpoq. Allaammi unnuisarfinni privatinilu unnuineq ataaseq minnerpaamik 400 koruuneqartarpoq.

Ilaqutaasut aningaasaajarujussuartarput, uffalu napparsimasup najornerani isertitaqaratik. Tamannarpiaavoq peqatigiiffiit suleqatigiilernermikkut iliuuseqarfiginiagaat.

- Inatsisartut ukiut arlallit takunikuussavaat toqqutaanerpaasoq. Neriuffilluunniit maaniittoq allaffeqanngilaq – kattuffik Nuummilu immikkoortortaq. Tamakkuninnga pilersitsisariaqalerput maannakkut, taamaaginnartoqarsinnaanngilaq. Taanna nappaat atugaatigisoq erloqinartigisorlu taamatut uninngaannartoqarsinnaanngilaq saqqummertariaqalerpoq maannakkut, Agnetha Petersen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat