Peqatigiiffik Naalagaaffeqatigiiffik: Nakimaannerup siunissaq ajortunngortissanngilaa
Peqatigiiffik Naalagaaffeqatigiiffik allaaserisaqartuuvoq, siulittaasoq Nauja Lynge, siulersuisuni ilaasortaq Jairus Lyberth siornatigullu naalakkersuisuusimasoq Palle Christiansen allaaserinnittuullutik.
Naalakkersuisut siulittaasuata Kim Kielsenip Kalaallit Nunaata Danmarkillu attaveqaqatigiinnerata nukittuujunera pisortatigoortumik oqaatigisariaqaraa, allaaserisaqartut taakku pingasut oqaatigaat.
Kalaallit Nunaanni aningaasaqarniarnerup aaqqiivigineqarnissaa, meeqqallu siunissaami atugaasa pitsanngorsaavigineqarnissaat, taakku ujartorpaat.
Aaqqinissallu utaqqitinneqaratik maannangaarlu iliuuseqartoqartariaqartoq Peqatigiiffik Naalagaaffeqatigiiffiup kissaatigaa:
- Kalaallit Nunaata aningaasarlioraluttuinnarnera allaallumi nakkariartuinnarnera pillugu tusatsiakkat imaaginnavipput. Meeqqat nerisaqarsinnaanissaat qulakkeerumallugu qarasaasiatigut attaveqaqatigiittarfikkut Facebookikkut suliniuteqartoqassanersoq allaat oqaluuserineqarpoq. Pissutsit qaqugukkut ajorsivissanersut eqqoriarneqarpoq. Qaqugu tamanna pissanersoq eqqoriaruminaappoq, nalunngilarpulli iliuuseqartoqanngippat pissutsit ajorseriaannarumaartut, Peqatigiiffik Naalagaaffeqatigiiffik ilaatigut taama allaaserisaqarpoq.
Aningaasarsiornikkut aaqqissuusseqqittoqarnissaa, tassungalu atatillugu ineqarnermut-, ilinniartitaanikkut inunnillu isumaginninnikkut aaqqissuusseqqittoqarnissaa allaaserisaqartut ujartorpaat.
