Peqatigiiffik Kalaallit Meerartaat Roskilde Festivalimi burgerinik tuniniaasoq

Peqatigiiffik Kalaallit Meerartaat Roskilde Festivalip neriniartarfittaani Foodcourtimi cafemik Hot Arcticimik taaguusersimasaminik ingerlataqarpoq.

Cafe maannamut ilutsitsiffiulluarsimasoq, peqatigiiffiup generalsekretæria, nammineq kajumissutsiminnik sulisut 28-t peqatigalugit burgerinik tuniniaaqataasoq oqaluttuarpoq.

- Ingerlalluartupilussuuvoq. Alutorsaatigineqalaavissorpoq.

Hot Arctic ippassaq ima tunisaqartigaaq unnuap-qeqqalernerani nunguutsigami matuinnartariaqarsimalluni. Nalunaaquttap-akunneranut nerisassat ataatsimoortut marluk arfarlu tunivagut, Tina Frausing oqaluttuarpoq.

Kaaviiaartitat suli paaseqqissaarneqanngillat, ullormili siullermi 50.000 koruuninik isertitaqarsimapput, nerisassaarniarfimmut aningaasartuutigineqartut amerlaqataasa missaat. Tunisat taamaaginnassappata Peqatigiiffiup Kalaallit Meerartaat Roskilde Festivali naammassippat 150.000 koruuninik iluanaaruteqarnissani ilimagaa, taakkulu kalaallit meerartaannut suliniutinut atorneqassapput.

Peqatigiiffik Kalaallit Meerartaat Danmarkimi festivalit annersaannut siullerpaamik peqataavoq, Tina Frausingillu peqatigiiffiup ukiuni tullerni qulini taamatut tuniniaasarnissaa pilersaarutigilereerpaa.

- Taamaalillutami millioninik kaaviiaartitsisinnaassaagut, Tina Frausing oqarpoq.

Hot Arcticimi tuniniarneqartut tamaasa atlantikup avannaaneersuupput, tassalu aalisakkat kinguppaallu Royal Greenlandimeersut umimmaallu neqaat. Festivalertullu tamakku alutorsaatigivissoraat, Tina Frausing oqarpoq:

- Umimmaap neqaa mamanaarpaat, assullu apersuisarput nalinginnaasumillu iluarisimaarpaat.