Peqatigiiffik Kalaallit Meerartaat iluatsilluartumik aaqqissuussivoq

Peqatigiiffimmi Kalaallit Meerartaanni allaffimmi pisortap Tina Frausingip pisut naatsumik ima oqaatigai.

- Aaqqissuussineq iluatsittorujussuartut oqaatigisinnaavara, Tina Frausing oqarpoq.

Marloriarluni assammik arsarluni unammisoqarnerani Glostrupimi timersortarfissuaq ulikkaavillugu isiginnaartoqarpoq. Unammisut siulliit tassaapput utoqqasaat, ilaatigut inuttaralugit Nunatsinni assammik arsartartut nunanut allanut unammisartut siornatigut sungiusaasorisimasaat Per Skaarup aamma isiginnaartitsisartoq Mads Mikkelsen, taakkua unammivaat AG håndboldimeersut toqqartukkat. Tassanilu utoqqasaat ajugaapput.

- Ullorissaaqigatta, aamma assut iluaqutaasunik ilaqaratta, soorlu isiginnaartitsisartoq Niels Olsen, siuarsimasorigatsigu, taannalu isaatitsisorigatsigu, aamma isiginnaartitsartoq Mads Mikkelsen saamiatungaanniittorigatsigu. Nuannisaqaagut aamma alutorsartitsilaavisoorpugut, Per Skaarup oqarpoq.

Unamminermi nikinnermi Rasmus Ott juullimut mappersakkami Josef og Josefinemi peqataasoq miilionip koruunip affaanik Peqatigiiffimmut Kalaallit Meerartaannut tunissuteqarpoq. Aningaasat taakku isiginnaartitsisartoqatinilu Sebastian Aagaard-Williams-ilu tv-kkut aallakaatitassiami taaguutilimmi 'Hvem vil være millionær'-imi decembarimi ajugaanermikkut eqqugaraat. Aningaasat millionit affai taakku, ilaqutariinnut attaveqaatissanik suliniuteqarnermi atorniarneqarput.

- Ilaqutariinnik attaveqaatissanut suliniuteqarnermi pineqarpoq, ilaqutariit pissakinnerusut ilaqutariinnik allanik attaveqalernissaat, tassa tamakkiisumik meerarsianngortitsisoqanngikkaluarluni ilaqutariinnik oqilisaassisussanik pissarsiornerussaaq, Tina Frausing oqarpoq.

Ulloq naggaserlugu kalaallit nunanut allanut unammisartuisa Danmarkimi første divisionimi unammisartut AG håndboldimeersut suli ajorsartinneqarsimanngitsut unammivaat. Nikinnermi kalaallit ajuunnermik ataatsimik siuarsimagaluarsinnarlutik - unamminerup naammassinerani 26-24-mik ajorsarput. Nunanut allanut unammisartuni siornatigut sungiusaasuusimasup kalaallit angusaat naammagisimaarpaa.

- Nunanut allanut unammisartut angusarissaarnerat tupigusuallaatigaara. Holditut unammeqatigiilluarput, kinguarsimasorissaarlutik unammisartullu inuusuttut ikioqatigiilluarlutik. Tamannalu ajunngilluinnarpoq, Per Skaarup naggasiivoq.

Inuit tuusintit missaanniittut Glostrupimi timersortarfissuaq ippassaq takuniarpaat. Ippassarlu aaqqissuussinermit sinneqartoorutit tamarmik Peqatigiiffimmut Kalaallit Meerataannut tunniunneqarput.

Tina Frausingip erseqqissarpaa, aningaasnik katersuiniarnerup saniatigut, peqatigiiffiup Danmarkimi ilisimaneqarnerulernissaa siunertarineqartoq.

Ilaqutariinnik attaveqartarnissamik suliniut ukiuni sisamani ingerlanneqassaaq, Nuummilu piffissami qaninnermi aallartinneqassalluni.