Peqatigiiffik Kalaallit Meerartaanni pisortaq tunuartoq
Peqatigiiffiup siulittaasuata Mads Thyregodip oqaatigaa, Tina Frausing ukioq ataaseq matuma siorna ajoqusersimasoq maannalu piffissami sivisuumi sungiusartussanngorami atorfik ulluinnarni annertuumik piumasaqaatitaqartoq ingerlateqqissinnaajunnaaraa.
- Taamaammat suleqatigiinnerput unitsinniarlugu isumaqatigiippugut, Tina Frausingillu ukiuni kingullerni arfineq-pingasuni pisortatut sulilluarsimaneranik qujassuteqarfigalugu, Peqatigiiffik Kalaallit Meerartaanni siulersuisuni siulittaasoq Mads Thyregod tusagassiorfinnut nalunaaruteqarluni taama allappoq.
- Tina Frausingip peqatigiiffik nutaaliaasoq, eqaatsumik suleriaaseqartoq ingerlalluartorlu pilersissimavaa, angusaqarfiusumik suliniuteqarnikkut attaveqarluarnikkullu aningaasaateqarfissuit, inuinnaat tunissuteqarnissaat politikkikkullu tapersersorneqarnissaq soqutigineqalersissimallugu, siulittaasoq oqarpoq.
Pisortap tullia Puk Draiby Peqatigiiffik Kalaallit Meerartaanni pisortaagallaassaaq ulluinnarnilu ingerlatsineq isumagissallugu.
