Peqatigiiffik inunnut kalaallisut tunuliaqutalinnut atugarliortunut ikiuunniartoq
Danmarkimi inissaqanngikkaanni qanoq iliortarpat? Imaluunniit pisortaniit mailikkut saqqummertaartut allakkat paasiuminaatsikkaanni?
Kalaallit Nunaanniit Danmarkimut nuulluni apeqquterpassuusinnaapput. Taamaattumik peqatigiiffik Sila 360 Danmarkimi innuttaasut kalaallisut tunuliaqutalinnut atugarliortunut, inatsisitigut akeqanngitsumik ikiorneqarnissaannut suliniummik nutaamik, februaarip aallaqqaataani piareersimasuuteqarpoq.
Innuttaasunut atugarliortunut inatsisitigut siunnersorneqarsinnaanissaannut, Danskit aningaasanut 2025-mut inatsisaannut Atlantikup avannaanut aningaasaliissutitigut, ukiunut sisamanut 8 millionit koruunit immikkoortinneqarput. Peqatigiiffiup København, Aarhus, Aalborg aamma Odense inissisimaffigissavai. Peqatigiiffimmik pilersitseqataasoq maanna pisortaasoq Tina Naamansen oqaluttuarpoq.
- Aqqusinerni illullu akornanni aqqusinilianiissaagut, tassanilu innuttaasunit naapinneqarsinnaassaagut naapitattalu sulianik sunik ikiorneqarnissaminnik pisariaqartitsiffii pillugit oqaloqatigineqarsinnaassalluta. Suliassat suunerinut misissuinermut ikiuunnerusinnaavoq, aalajangiinermut tunngaviusunik nalilersuinerusinnaavoq imaluunniit suliani paatsuungassutaasinnaasunik misissuinermut ikiuulluta, Tina Naamansen inatsisilerituutut ilinniagalik oqarpoq.
Periuseq paasiuminaatsoq
Peqatigiiffik oqalutsinik, inatsisilerituunik, isumaginninnermik siunnersuisunik imaluunniit suliniummut nutaamut atorfimmik naleqquttumik atorfinittussarsiuleruttorpoq.
Suleqatigiit, innuttaasunit orninneqarsinnaallutik sapaatip-akunneranut ataasiarlutik danskit illoqarfiini anginerusuni tamaniittarnissaat, Tina Naamansenip naatsorsuutigaa.
Tassani namminneq pisinnaatitaaffitik pillugit aamma nunap inoqqaavisa pisinnaatitaaffii pillugit paasitinneqarnissaat, taakkununnga immikkut pingaaruteqarpoq. Kalaallit innuttaasut pisinnaatitaaffiisa atorneqarnissaannut periutsinik suli akimmiffeqarpoq, Tina Naamansen oqarpoq.
- Aamma oqaatsitsigut suli akimmiffeqartoqarpoq, sullissisut innuttaasumut paasinartunngorlutik ikiorsiissutip eqqortup tunniussinnaanissaanut oqalutseqartoqartariaqartoq, ingerlatsivimmiit suli paasineqanngilaq, taanna oqarpoq.
Kalaallit innuttaasut pisortanik ataatsimeeqateqaleraangata qallunaatoorsinnaanerat naammassorineqakkajuttarpoq. Taamaattumik oqalutseqarnissamut neqeroorfigineqarneq ajorput, Tina Naamansen oqarpoq.
- Oqaatsilli suliamut tunngasut allallu assigiinngitsut pineqartillugit inuit tunuartilertarput. Tamannalu Danmarkimi periusiuvoq paasiuminaatsoq, aamma apeqqutit eqqortut suuneri sumullu maalaaruteqarsinnaaneq pillugit paasiniarnissaat ajornakusoorsinnaavoq.
Angajoqqaanik ikiuineq
Akeqanngitsumik inatsisitigut ikiunissamik neqerooruteqarnermik suliniutip saniatigut, peqatigiiffik Danmarkimi meeqqat angerlarsimaffiup avataanut inissinneqarnikut kalaallinik angalinnut ikiuinissamut aningaasaliiffigineqarpoq.
Suliaq ukiuni arlalinni ukkatarisaat.
Suliniut ineriartorpoq, Tina Naamansen oqaluttuarpoq. Tassani suliniummut Danmarkimi Isumaginninnermut- Ineqarnermullu ministeriamit, ukiuni pingasuni – 2026-miit 2029-mut - 3 millionit koruunit sinnerlugit tunineqarput.
