Peqatigiiffik inuiaqatigiinni pisunut oqallittarfik pilersinneqalerpoq

Narsami suliffissuup matunera inuiaqatigiinnilu pisut assigiinngitsut pillugit oqallittarfimmik amigaateqartoqarpoq.

Taama isumaqarpoq inuiaqatigiilerinermi kandidateq Søren Stach Nielsen. Taanna soqutiginnittut allat marluk ilagalugit peqatigiiffimmik aallartitsilerpoq.

Peqatigiiffik Inuisa-mik ateqartinneqassaaq imaluunniit ”Det Grønlandske Samfundsvidenskabelige Selskab”, aqagulu aallarnerlugu ataatsimeersuartitsisoqassaaq.

Peqatigiiffimmi inuit ilisimasallit politikkimillu oqallinnermik soqutigisallit, ilisimasatik isummatillu annillugit peqatigiiffimmi naapeqatigiissinnaassapput.

-Assersuutigalugu Narsami suliffissuup matunera taassumalu illoqarfimmut innuttaasunullu kinguneri ilisimasalittut isigalugu arlaannaannulluunniit atttuumassuteqarata oqallisigisinnaarusupparput, Søren Stach Nielsen oqarpoq.

Søren Stach Nielsen-ip saniatigut aamma Ilisimatusarfimmi ilinniartoq Markus E. Olsen kiisalu Marie Kathrine Poppel peqatigiiffimmut isumassarsisunut ilaapput. Peqatigiiffillu neriulluarfigineqarpoq.

-Ilisimatusarfik, suliatigut peqatigiiffiit, allallu peqatigiiffimmut annertuumik soqutiginnipput, Søren Stach Nielsen oqarpoq.