IKIORTARIALLIT Peqatigiiffik Aalborgimi kulturimik nutserisortaarusuttoq

Aalborgip Kommuniani kalaallinik sullissivik sulisut kalaallillu inuunerminnik ajornartorsiortut akornanni kulturimik nutserisinnaasunik atorfinitsitsisariaqaraluarput, peqatigiiffik Ikerasak taama isummerpoq. Kommuni Kalaallillu Illuutaat akerliliipput.

Aalborgip Kommuniata ingerlataa Aalborgimi kalaallinik sullissiviup sulisuisa kalaallillu innuttaasut akornanni attaveqarneq ingerlalluanngilaq.

Aalborgimi kalaallit peqatigiiffianni Ikerasammi siulittaasoq Juusi Petersen taama oqarpoq.

- Ajornartorsiut annerpaaq tassaavoq oqaatsit. Isumaginninnikkut ikiuutisisussat tassaasarput danskisut oqalussinnaarpianngitsut, ajornartorsiutimik oqallisiginissaannut ajornartorsiortut, taamaalillutik ajornartorsiummi qitiusoq iserfiginngitsoortarlugu. Tassaniuna ajornartorsiutit pilersartut, Juusi Petersen taama oqarpoq.

Aamma atuaruk Aalborgimi aqutsisoq: Aningaasat pineqaratik ilisimasat pineqarput

Aalborgip Kommuniani Kalaallinik sullissivik assigiinngitsunit nersualaarneqartaraluarpoq kalaallit Danmarkimut nuuttut immikkut samminiartaramigit.

Juusi Petersenili naapertorlugu Kalaallinik sullissivimmiittut kalaallit kulturiat ilisimasaqarfigivallaanngilaat. Peqqutaasullu annerpaartarigaat oqaatsit assigiinnginnerujussuisa akimmittoortitsisarnerat.

Taamaattumik Juusi Petersen isumaqarpoq kommuni oqalutsinik kalaallisullu oqaasilinnik amerlanerusunik atorfinititsisariaqartoq, tamakkumi kalaallit inuuniarnikkut ajornartorsiortut isumaginninnikkullu sullissisut akornanni attaveqaataasinnaagaluarmata.

 

Qallunaatut nassuiaaniarneq ajornartorsiutaavoq

Karl Geisler ilaquttanilu Nuummit Aalborgimut ukiut arfineq-marluk matuma siorna nuupput.

Aamma atuaruk Danmarkimi kalaallinut ajornartorsiortunut kommunit ikiuutissaat assigiinngeqisut

Ilaqutariit isumaginnittoqarfimmit assigiinngitsunik ikiuutisinissartik pisariaqartissimavaat, amerlasuutigulli kommunip kalaallinik sullissivianut qallunaatut nassuiaanissartik ajornartorsiutigisarsimavaat.

- Iluassagaluarpoq kommunip kalaallinik sullissiviata, Grønlænderenhedeertugaanni, Kalaallit Nunaanniinnikunik kalaallinullu ilisimasalinnik marlunnik pingasunilluunniit sulisoqartuuppat, Karl Geisler KNR-imut oqarpoq.

Kalaallinilli sullissivimmi inunnik isumaginnittunik kalaallinik atorfinitsitsiniarsarisarsimagaluarput, iluatsitsinerli ajorlutik.

Aamma atuaruk Kalaallit Illuutaasa peqataatitsiniarneq ima pitsanngorsarniarpaat

Kalaallit Nunaanniilli inunnik isumaginnittungornianik praktikkertoqartarsimapput.

 

Oqalutsinik sulisoqarpoq

Oqalutsinillu sulisoqartoq Kalaallinik sullissiviup pisortaa, Jeppe Bülow Sørensen oqarpoq.

- Innuttaasumik saaffiginnittoqarpat oqalutseqarusuttumik taava oqalutsimik inniminniisarpugut, taava ulloq alla oqalutsilerluni oqaloqatiginnittoqarsinnaasarpoq. Taamaammat oqalutseqarnissaq piumasarineqarsinnaajuaannarpoq.

- Paaseqatigiilersitsisinnaasumullu tunngatillugu, oqaloqatiginnilernermi ikiortigisinnaasamik imminermik nassuiaallaqqinnermik ilaqartoqarsinnaavoq, Jeppe Bülow Sørensen oqarpoq.

Kalaallit Danmarkimiittut Danmarkimi pisortat qallunaatut ingerlanissaat naatsorsuutigisariaqaraat, Aalborgimi Kalaallit Illuutaanni pisortaq Søren Stach Nielsen isumaqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl