Peqatigiiffiit demokratiimut iluaqutaapput

Nunat Avannarliit Siunnersuisoqatigiiffiata, Nordisk Rådip, nunani avannarlerni demokratiip atugai pillugit misissuisussamik ataatsimiititaliorpoq, ataatsimiititaliallu nalunaarusiaa ullumi saqqummiunneqarpoq.

Kim Godtfredsen Ilisimatusarfimmi ilinniartoq demokratii pillugu oqarpoq, demokratii tassaasoq inuit nunaminni aqutseqataanerat, qinersineq, inuullu kinaagaluaruniluunnit sumilluunniit oqaaseqarsinnaanera.

- Ullumikkut demokratiimut sunneeqataaniaraanni partiinut, peqatigiiffinnullu assigiinngitsunut ilannguttariaqarput, Kim Godtfredsen oqarpoq.

Kim Godtfredsenip ilanngullugu oqaatigaa, siornatigut peqatigiiffilerineq demokratiimut peqataanikorujussuaq ajoraluartumik massakkut tunuariartortoq.

- Inuit peqatigiiffilerinermut ungasilliartornerat demokratiimut peqataanermut sunniuteqartupilussuussaaq, Kim Godtfredsen oqarpoq.

Nunat Avannarliit Siunnersuisoqatigiiffiata Nunani Avannarlerni demokratii pillugu nalunaarusiaa, Naalakkersuisunut ilaasortap Josef Tuusi Motzfeldt-ip ullumi saqqummiutissavaa.