Peqataarngaartoq misilittagartoorlu siuuttuussapput
Timersortartut 3.500-nit ikinnerunngitsut qeqertanit assigiinngitsunit 25-neersut erfalasuminnik aalaterissapput Island Games qeqertami Isle of Wightimi ammaanersiorneqalerpat. Pisarnertut katinngatilisartoqarlunilu erfalasulisartoqassaaq.
Imaq pillugu pingaartorsiortoqassaaq Island Gamesip ammaanersiorneqarnerani, tassuuna takutinniarneqartarmat qeqertat peqataasut immamik avatangiiseqartut. Peqataasut tamarmik imartamik ernga puiaasamut ikillugu nassartarpaat ammaanersiornermilu imaasivimmut ataatsimut kuineqartarput peqataasuta ataatsimoornerat takutinniarlugu.
Timersoqatigiit kattuffiata toqqarsimavaa volleyballertartoq Ole Karl Kreutzmann imilisartuussasoq. Taanna maanna misilittagartuutut taaneqarsinnaasoq arfinilissaa Island Gamesimi peqataalerpoq kingullermillu Island Gameseqarnerani hæveriullaqqinnerpaatut toqqarneqarpoq.
Katinngatilisartuussaaq sulorarnermi nunatsinni pissartaq Sara Lindskov Jacobsen. Taanna siuuttuujumaarpoq kalaallit timersoriat isaalerpata Isle of Wightimi illoqarfeeqqami Ryde-mi.
