Peqataanissartik akissaqartinngilaat

- Ilimaginngilluinnarpara 200.000 koruuninik qimmit qamutillu timmisartumik Qasigiannguanut assartuunnissaannut akiliutissanik sapaatip akunneri marluk ingerlanerini katersisinnaassalluta, Stefan Hammer, Sisimiuni qimussertartut peqatigiiffianni, Qimusseq Sisimiut-ni aningaaserisoq oqarpoq.

Avannaata qimussersua sapaatip akunneri pingasut qaangiuppata ingerlanneqartussaavoq. Pilersaarutit naapertorlugit avannaaniit Upernaviup eqqaaniit kujammut Sisimiunut peqataasoqassaaq.

Sisimiuni qimussimik marsip pingajuani sukkanniuuttoqarpoq, sukkanerit tallimat Avannaata Qimussersuanut anngullutik.

Sisimiuni qimussertartut peqatigiiffiata aqqutit marluk Qasigiannguanukartitsinissamut periarfissarai.  Tassa Air Greenlandip timmisartuutaanut ilaatitsilluni imaluunniit angallammik attartorluni.

Peqatigiiffik Air Greenlandimit neqeroorfigineqarsimavoq timmisartumik attartorneq 200.000 koruuninik akeqarsinnaassasoq.

Sisimiuniilli avannaanut imaatigut angallavik kitaata sikuanik maannakkut angallaviusinnaanngimmat, qularnarpoq angallammik angallanneqarsinnaanissaat.

- Peqataatitaqarsinnaanerput maannakkut ilimanarunnaarpoq, aningaasanik taama amerlatigisunik katersisinnaanaviannginnatta, Stefan Hammer oqarpoq. Taannalu erseqqissaavoq Qimusseq Sisimiut siulersuisuisa tamanna sapaatip akunerani matumani aalajangiutivissagaat.

Qimusseq Sisimiut Qeqqata Kommunianit 25.000 koruuninik ukiup siuliini tapiiffigineqartarpoq.

- Peqatigiiffik kommunimut maanna qinnuteqarsimanngimmat, kommunimit tapiiffigineqarnavianngilagut,  Stefan Hammer erseqqissaavoq.

Kommunimiillu tapiisoqassanngitsoq uppernarsarneqarpoq:

- Peqatigiiffimiit qinnuteqaammik tigusaqannginnatta tapiisinnaanngilagut, Qeqqata kommunianiit sunngiffimmi samisassaqartitsinermut pisortaq nassuiaavoq.