Peqataajumajunnaarneq partiinit naalakkersuisooqataasunit taperserneqarpoq

Partiit naalakkersuisooqataasut Atassutip Partii Inuillu siulittaasuisa Aleqa Hammond tallimanngormat ataatsimeeqatigaat. Suliaq ataatsimiinnermi eqqartorpaat, Naalakkersuillu siulittaasuata ataatsimeeqataajartorluni Kirunaliarnissaa isumaqatigiissutigalugu.

Naalakkersuisooqataasut qulaatiinnarlugit aalajangiisoqarsimagaluartoq, Aleqa Hammondip peqataannginnissamik aalajangernera Gerhardt Petersenip eqqortutut isumaqarfigaa.

- Naak Issittumi pingaarutilimmik inissisimagaluarluta 2011-mi ukiakkulli peqataasimannginnatta pissusissamisoorsoraara, Gerhardt Petersen oqarpoq.

Peqataannginnissaq qanoq ilillusi aalajangiuppisiuk?

- Tallimanngormat ataatsimeeqatigiikkatta eqqartorparput. Tassanili peqataannginnissaq aalajangiunneqarani oqaloqatigiinnerit ingerlanneqarneri pissutigalugit peqataanissaq aalajangiunneqarpoq.

Takkutinngitsuuinnarneq isumatusaarnerunasoraajuk?

- Taama sivisutigisumik mattusimaneqarsimagaanni, naammagilersimallugu oqaaseqarneq isumaqatigaara, isumaqatiginninniarnivimmut peqataatinneqarusuppugut, asuli atsiortitaaginnarata.

Partii Inuit aamma aalajangiinermut peqataatinneqarsimanngilaq, radioaviisilli paasisai naapertorlugit partiip peqataajumannginneq taperserpaa. Nikku Olsen, Miiti Lynge, Randi Broberg Lars Mathæussenilu oqaaseqartinniaraluaratsigit iluatsinngilarput. KNR-ip Poul Jensen oqaloqatigaa, taassumalu partii sinnerlugu paasissutissiissutigaa Aleqa Hammondip iliuuserisaa taperserneqartoq.