Pele Møller 70-iliinissaanut pilluaqqullugu nipilersortoqassaaq
Nipilersortartut 70-iliisut sulilu nipilersortarnissaminnik pilersaaruteqartut akuttupput. Jazzimilli nipilersortartoq Pele Møller taakkununnga akuuvoq. Ataasinngorpat 70-iliissaaq, sulili nipilersornermik sammisaqartuulluni.
Allattoq Jaaku Lyberth
aggustip 28-at 2009 08:12
Kommuneqarfik Sermersuup nipilersortartunik assigiinngitsunik Nuup katersortarfiani nipilersortitsilluni Pele Mølleri aqagu arfininngornermi pilluaqquniaraa, Sermitsiaq allappoq.
- Pele Møller ukiorpassuarni nipilersortarnermigut Nunatsinnut annertuumik tunniussaqarpoq. Taamaammat 70-iliineranut atatillugu utertitsivigilaarnissaa pissusissamisoorsoraarput, Jørgen Benjaminsen Kommuneqarfik Sermersuumeersoq Sermitsiamut oqarpoq.
Nipilersortitsineq unnukkut nalunaaqutaq arfineq-pingasunut aallartissaaq, nipilersoqatigiillu assigiinngitsut nipilersussapput. Tamanna pereerpat Pele Møller nammineq nalunaaqutaq qulinut nipilersussaaq.
Tusarnaartitsineq tamanut ammassaaq isernerlu 100 koruuneqassalluni. Maanngaaniillumi aamma pilluaqquarput.
