Eqqaaniut: Pele Møller toquvoq

Nunatsinni nipilersorneq ersarissumik sunniuteqarfigereerlugu jazzerpalaartumik guitarertartoq Pele Møller ataasinngornermi unnukkut eqqissisoq, ilaqutai ilisimatitsipput.

Amerlasuut eqqaamassavaat Pele Møllerip assaasa guitarip qungasiatigut qitittuusiinnartarnerat erinnap ataatsip ingerlanerani patiffippassuarnik tigusisarlutik allaanerlu ajorluni nunarsuarmi ajornannginnerpaasoq. Ilisimasarpassuanili kisimi pigiinnarusunngilai. Ukiut ingerlaneranni guitarertalerusuttorpassuit unnukkut atuartitsinermi allatigullu ilinniartittarpai. Kaammattuutigiuartagaa tassaavoq sungiusartuarnissaq.

Nammineq guitarimik sungiusarnini illoqarfimmi 1939-mi inunngorfigisamini Qullissani aallartippaa. Pele Møllerip peroriartornerani Qullissani nipilersorneq uummaarilluinnarpoq. Vajgat Orkesterit 1950-ikkunni 1960-ikkunnilu nuannarisaalluarlutik tusarsaapput.

Pele Møller kingusinnerusukkut Vajgat Orkesterini ilannguppoq nuannaartorisani Jens Hendriksen, Jensinnguaq aamma Jens Leibhardt, Jensequtaa nipilersoqatigisalerlugit. Pele Møllerip sungiusaasoqqaavaa tassaavoq Vajgat Orkesterip guitarertua pikkorissoq Pele Lange.

Nipilersornikkut angalaneq

Pele Møllerip illoqarfik inunngorfigisani Qullissat qimallugit Danmarkimut ilinniariartorpoq. Angalaneq ilinniagaqarnerinnaanngilaq. Tamanna aamma nipilersornikkut inerikkiartorfiuvoq.

Nalaatsornikkut Pele Møllerip jazzimik nipilersullaqqissut peqatigisalerpai taakkulu aamma iluarusuutigalugu kalaallip guitarillaqqissup ingiuisarnera.

Pele Møllerip illoqarfik inunngorfini nipilersornikkullu avatangiiserisai puigunngisaannarpai – aamma illoqarfik aamarsuarsiorfik Qullissat 1972-mi matuneqareeraluartoq.

Vajgat Orkesterikkut Qullissani nipilersoqqinnissaannik 1988-mi suliniuteqarpoq. Suliniut iluatsippoq nipilersornermillu videoliaq Vajgat Orkesterip avatangiisitoqaani immiunneqarmat cd nuusiorfiup Ulop immiussisarfiani ‘Qullissani naapeqqinneq’ immiunneqarmat Nunatsinni nipilersornerup oqaluttuassartaani kapitali pingaarutilik tammatsaalineqarpoq.

Pele Møllerip nammineq nipilersoqatigiini Pele Møller Band pilersippai ukiut ingerlaneranni assigiinngitsunik inuttaqartartut. Pele Møllerikkut immiussaat arlallit nuusiorfiup Ulop saqqummersippai nipilersoqatigiillu taakku Nunatsinni pisuni pingaarutilinni aamma nipilersortuutinneqartarlutik.

Pele Møller sivisuumik napparsimareerluni ataasinngornermi unnukkut toquvoq. Nipilersornikkulli saqqummersitani tv-milu aallakaatitatigut takussaasutigut tunniussarpassui eqqaamaneqartuarumaarput. 

Pele Møllerip eqqaaneqarnera ataqqinartuuli.