- Unami inatsisaavoq. Inuussutissanut atatillugu ingerlatsinermi atortorpassuarnik sulisunillu atuisariaqartarluta, uannga ingerlatsineq akikinnerujussuussaaq, Pele Broberg oqarpoq.

Pele Broberg susassaqarfimmik tigusineq pillugu: Pisariunngitsoq pingaartorli

Ingerlatsivinnut, naatsorsuuserinermut kukkunersiuinermullu tunngasut tigunerannut atatillugu, inatsisitut allannguingaarnissaq Naalakkersuisut pilersaarutiginngilaat. Tigusinermi tigusap nalitunera Pele Broberg-imut pingaaruteqarpoq, taanna nassuiaavoq.

Ukiut qulit kingulliit ingerlaneranni aatsaat Naalakkersuisut susassaqarfimmik Danmark-imiit tigusaqarput. Inuussutissarsiornermut niuernermullu Naalakkersuisoq, Pele Broberg, Naleqqameersoq, pingasunngormat unnukkut taamatut nalunaarpoq.

Tamassuma Naalakkersuisut tamarmiullutik aalajangigaasimanera erseqqissarlugu, taanna maanna itisiliineruvoq.

- Tunngaviusumik malunnaatilimmik allanngortiterisoqassanngilaq. Ukununnga atatillugu tamanna pingaarnerunngilaq. Taakkua inatsisitigut ullumi taamaallaat kunngikkormiunit peqqussutitigut ingerlanneqarput. Tamatumunngalu uagut isumaqataaginnarsinnaasarpugut imaluunniit tamassuma ilaata Kalaallit Nunaannut atuutissannginnera oqaatigisinnaallutigu, taanna nassuiaavoq.

Allannguinissatsinnut periarfissaqalerpugut

Susassaqarfiit taakkua Naalakkersuisut tigorusuppaat, amerlanerussuteqartut politikkikkut isumaqataagaangata, Inatsisartut namminneq malittarisassiorsinnaalissammata.

Inatsisit maannakkutut isikkoqartillugit ingerlatseriaaseq tunngaviusumik iluaqutissaqartut, Pele Broberg isumaqarpoq. Piumasaqaatit arlalllit taassuma allanngortikkusunngilai, taakkua assersuutigalugu EU-mut nioqquteqarsinnaanermik niueqateqarsinnaanermillu ammaasseqataammata.

AAMMA ATUARUK Ukiut qulit pisoqaqqittoq: Nunarput suliassaqarfimmik angerlaassisoq

- Assersuutigalugu aamma suliffeqarfinnut Nunatsinniinnaq ingerlatalinnut nalimmassaasinnaalerpugut. Tamakkuali pillugit allannguerusukkutta tamanna susassallit akorngini Inatsisartunilu oqallisigisassavagut, taanna oqarpoq.

Taassuma assersuutigalugit suliffeqarfiit mikisut illoqarfinni ataasiakkaaginnarni suliallit oqaatigai. Tamakkua nunanut tamanut nioqquteqartussaanngimmata, allaffissornikkut ikinnerusunik piumasaqaateqarfigisalernissaat suliarineqarsinnaavoq.

 - Inatsisip uuma oqartussaaffigilerneranut pingaaruteqarfia unaagami; uagut nammineq allannguinissatsinnik isummersinnaalissagatta.  Tamanna pingaaruteqartorujussuuuvoq. Inuiaqatigiit siunissamik allanngueqatigiilluta taamatut tapersersoqatigiinnissatsinnut inissinnissaq pingaaruteqarpoq.

Susassaqarfik pisariunngitsoq

Maannakkorpiaq susassqarfiit Kalaallit Nunaannut tunngasut 31-t suli Danmark-imit akisussaaffigienqarput. Tamakkua ilagaat inuussutissat tamakkununngalu atatillugu nakkutilliinerit, politiit, timmisartornerit kiisalugymnasiani ilinniarnerit.

Taamaammat sooq ingerlatsivinnut, naatsorsuuserinermut kukkunersiuinermullu tunngasut Naalakkersuisut maanna aalajangiiffigaat?

- Unami inatsisaavoq. Taamaammallu inuussutissanut atatillugu atortorpassuit sulisopassuillu pisariaqartsittarnerinut sanilliullugu uuma ingerlannissaa akikinnerujussuuvoq, taanna akivoq.

AAMMA ATUARUK Royal Arctic Line umiarsuarmik Sikuiuitsumut Kujallermukartitseqqittoq

Allatut oqaatigalugu, susassaqarfinnut tiguenqarsinnaasunut allanut sanilliullugu pisariinnerujussuulluni. Apeqqut killormut saatittariaqartoq, Pele Broberg isumaqarpoq.

- Susassaqarfik una sooq qangarsuarli tiguneqarsimanngila?, taanna akillorilluni aperivoq.

Taakkua akisussaaffiit tiguneqarnerisa qanoq akeqartussaaneri pillugit Naalakkersuisut naatsorsuinikuupput, kisitsisilli taakkua Pele Broberg-ip oqaatigerusunngilai. Inatsimmummi atatillugu Inatsisartut suliamikkullu taakkununnga attuumassutillit qanoq siunnersuuteqarneri apeqqutaatillugit akia allanngorsinnaavoq.

1992-imi peqqinnissaqarfiup tiguneqarneranut assersuuppaa

Ingerlatsivinnut, naatsorsuuserinermut kukkunersiuinermullu tunngasut maanna Danmark-imi Inuussusitissarsiornermik Aqutsisoqarfimmiipput, tassani tamakkunannga immikkut ilisimasalinnit suliarineqartarlutik. Susassaqarfinnulli taakkununnga atatillugu pisarialinnik piginnaasalinnik amigaateqalernissaq Pele Broberg-ip isumakuluutiginngilaa.

Pisariaqartillugu pisariitsumik sulisussarsiorsinnaanerup sinaakkusersornissaa apeqqutaavoq, taanna oqarpoq.

Tamma 1992-imi peqqinnissaqarfiup tiguneranut Pele Broberg-ip assersuuppaa. Taamani nakorsanik peqqissaasunillu naammattunik sulisussarsisinnaannginnissaq isumakuluutigineqarpoq.

AAMMA ATUARUK Atassut og Demokraatit vil have opgør med 40 års socialistisk styre

- Taamani iluarsiissutissat ilagaat Danmark-imi uppernarsaasiukkanik akuersineq, tamannalu ulloq manna tikillugu atuuppoq. Inatsillu una akisussaaffigilerutsigu aamma taamatut periuseqartoqarsinnaavoq.

Tassa Danmark-imi imaluunniit Tyskland-imi nunamiluunniit allami kukkunersiuisutut ilinniakkap akuerineratigut sulisussarsisoqarsinnaassaaq.

- Susassaqarfinnut tamakkununnga atorfissaqartitatsinnik sulisussarsiornissat pingaartutut suli isumaqarfigaagut. Tamanna allaanerunngilaq, taanna oqarpoq.

Inatsisartut aalajangiitinnagit oqallittoqarnikuunngilaq

Inatsisartut aalajangiinnginneranni taakkununnga atasumik inuussutissarsiutillit Naalakkersuisunit oqaloqatigineqarnikuunngillat, tamannali maanna pissaaq, taanna oqarpoq.

Taassumali erseqqissaqqippaa, Naalakkersuisut annertuumik allannguissamaanngitsut, taamaakkaluartorli aalajangigaq taassuma isumaa naapertorlugu annikinnerusumik pingaarnerulinngilaq.

- Namminersulivinnerulluta aalajangersimasumik immitsinnut aqqutissiuunnissarput tusartuarparput. Susassaqarfittut makkunatut ittorpiaat innuttaasunut allannguutinik annertuunik malitseqartariaqanngillat, assersuutaasinnaasutulli pingaaruteqarlutik, taanna oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl