Pedelip akissarsiani isumaqataaffigivallaanngikkai - peqqinnissamik ikiortip nuannaarutigigaa
Ilaat nuannaarput. Ilaalli nuannaarpallaanngillat.
SIK-mut ilaasortat SIK-p Namminersorlutillu Oqartussat isumaqatigiissut kiisami atsiugaat pillugu ilaatigut taama qisuariartoqarpoq.
SIK-p Namminersorlutillu Oqartussat akissarsiat ataatsimut isigalugit 8 procentinik qaffaavigai. Tamarmilli taama qaffaavigineqanngillat.
- SIK-p ilaasortaminut iliuuseqarnissaa piffissanngorpoq, Kangaamiormiu Ulrik Lyberth oqarpoq.
Taanna Kangaamiuni ukiuni kingullerni 20-ni utoqqaat illuanni meeqqerivimmilu pedeliuvoq. Taanna SIK-mut ilaasortaanerminut 225 koruuninik qaammatit tamaasa akiliisarpoq.
AAMMA ATUARUK SIK efter aftale: Alle medlemmer får mere i løn
Taassuma akissarsiami qanoq annertutigisumik qaffaavigineqarnissaa suli paasinngilaa. Ataatsimut isigalugu 8 procentimik qaffaasoqassasoq ilisimavaa, taakkuli qaffaatissat igaassa akiisa qaffakkaluttuinnarnerata nungoqqittaraat, taanna oqarpoq
- Qungujulaarutaavallaassagunanngilaq 8 procentimiluunniit anguneqaraluarpat taassuma siuliani isumaqatigiinniartoqarmat piluusaartuarlutik kiisami naammassigamik 9 procenti anguaat, taamanikkulli akit qaffapput 9 %-lu taanna ingerlaannaq nerineqarpoq, Ulrik Lyberth oqarpoq.
Marie Dorphilli akissarsiami qaffaavigineqarnera nuannaarutigaa. Taanna isumaginninnermut – peqqinnissamillu ikiortitut Qaqortumi utoqqaat illuanni Ajarsivasimmi sulivoq.
Isumaqatigiissut SIK-mi ilaasortat akuerippassuk, isumaginninnermut – peqqinnissamullu ikiortit akissarsiaqarnerulissapput. Taakku qaammammut 1.100 koruuninik akissarsiai amerlanerulissapput.
- Akissarsiatta qaffanneqarnerat inimut akiliinermut nerisassanullu iluaqutaasaaq. Aamma silarlukkaangat ungasissumi pavani najugaqarluni unnukkut silarluttumi taxartaratta, taxarnaqigami unnukkut aqqaninngoreeraangat anileraangatta, ingammik ukiumi, Marie Dorph oqarpoq.
Ilinniagallit akissarsiaat qaffaavigineqarnerupput
SIK Namminersorlutillu Oqartussat isumaqatigiissut martsip 31-ani naammassereersimasussaagaluarpaat, aatsaalli septembarip pingajuanni atsioqatigissutigaat.
Ilaasortat ilinniagallit akissarsiaat qaffaavigineqarnerpaassasut, SIK-mi siulittaasup, Jess G. Berthelsenip oqaatigaa.
AAMMA ATUARUK SIK Namminersorlutik Oqartussallu akissarsiat pillugit isumaqatigiissuteqartut
Assersuutigalugu immikkoortortaqarfimmi pisortat qaammammut akissarsiaat 6.000 koruuninik qaffaavigineqartut.
Ilinniagaqanngitsulli qaffaavikinnerpaassallutik.
- SIK-p ilaasortai ilinniagaqarsimanngitsut nalunaaquttap akunneranut koruunit 100-it missaannik tunngaviusumik akunnermusiaqarput. Taakkua saniatigut 3 koruunimik qaffariarlutik ukiup marluk qaangiuppata tiimimut 3 koruunimik aamma qaffaqqissapput, Jess G. Berthelsen KNR-imut oqarpoq.
Akikillisanik umiatsiakkut pisiniartariaqartarpoq
Qaffaassutaasulli Kangaamiuneersup, Ulrik Lyberthip hurraarutigivallaanngilai.
- Nunarsuarmi pissutsit allanngormata nunaqarfimmi inuuniarneq assut ilungersunarsivoq, taamaammat SIK-miit sullinneqarnerput aamma allanngortariaqarpoq.
- Akit amiilaarnaannartumik massakkut atorpagut.
- Nammineerluta umiatsiatsinnik illoqarfiliartariaqartarpugut ilaatigullu aamma nalunngisatta pisiassaannik ilanngussisariaqartarpugut Maani nunaqarfitsinni neqerooruteqartaraluarpormi kisianni annikitsuinnarmik, Ulrik Lyberth oqarpoq.
SIK-p Namminersorlutillu Oqartussat SIK-mut ilaasortat 6.900-t missaanniittut sulinerminni isumaqatigiissutaat 20-t missaanniittut septembarip pingajuanni isumaqatigiissutigaat.
- SIK-mi isumaqatigiissutit malillugit atorfeqartut meerartaarnermi kingorna sulinngiffeqarnerminni tamakkiisumik akissarsiaqarsinnaapput. Arnat SIK malillugu atorfeqartut sapaatini akunnerni 18-ini sulinngiffeqarsinnaatitaasaraluarput. Taakku manna sapaatini akunnerni 40-ni tamakkiisumik akissarsiaqarsinnaatitaalissapput.
- SIK-mi ilaasortat inoqutigiittut atorfininnerminni angalanissaminnut akiliunneqarsimasut soraarniuteqarnerminni angerlarnissaminnut akiliunneqartalissapput.
- Qanigisaasup pinartumik nappaateqarnerani imaluunniit toqukkut qimagunnerani kiffaanngissuseqarluni akissarsiaqartitaanissaat siusinnerusumik pisalissaaq.
- Qaammammusialittut atorfeqartunut ilaqutaasunullu akiliunneqarluni angalanissamut, sulinngiffeqarluni angalanissamut akiliunneqarnissamut aningaasaateqarfimmik immikkut pilersitsiffigineqartussamut tapiissuteqarfigineqartalernissaanik periarfissiisoqassaaq.
- SIK-mi ilaasortat pisortanilu sulisitsisut tapit soraarnerussutisiaqaataasinnaasut amerlineqarnissaat qitiutissimavaat. Tapit suut pineqarnersut allassimanngilaq.
- Tunngaviusumik akissarsiat SIK-mi ilaasortanut tamanut pitsaanerulersinneqarput. Tassani pineqartut ilagaat nunaqarfinni peqqinnissaqarfimmi sulisut, isumaginninnermut ikiortit, arnarsiat, talittarfinni mittarfinnilu sulisut assigisaallu akissarsiatigut immikkut qaffaavigineqarput.
