Pearyp tuttua eqqissisinneqartariaqarpoq
Akilinermi tuttu Pearyp tuttuatut taaneqartartoq
Canadami uumasut nungutaanngujoortut allattorsimaffiannut ilanngunneqassasoq Canadami avatangiisinut ministeri John Baird qanittukkut aalajangerpoq.
Pearyp tuttua Canadami tuttunit naliginnaasunit mikineruvoq Canadallu avannaarsuani issittumi uumasuulluni. Pearyp tuttuinik 1970-kkunni kisitsisoqarmat tuttut taakku 50.000-it missaanniittut oqaatigineqarsnikuuvoq, massakkulli ukiut 30-it ingerlareersut kisitsisoqaqqimmat paasineqarpoq Pearyp tuttui 8.000-it missaannaanniilersimasut.
Pearyp tuttuinik piniarnermik killilersuinissaq Nunavummi naalakkersuisut ukiualunngortuni anguniarsimavaat, Resolute Baymili Grise Fjordimilu piniartunit akimmisaartinneqartarsimallutik.
Nunavummi biologit isumaqarput Pearyp tuttuisa ikileriarujussuarsimanerat piniapilunneqarnermik pissuteqanngitsoq, silaannaalli allanngoriartorneranit pissuteqartoq.
Sila ukiuni kingulliunerusuni ukiukkut allaat siallertalerpoq tamatumalu kingunerisaanik nuna tuttut nerisaqarfiat sermiinnanngortarpoq taamaalingaangallu tuttut nerisassaarullutik perleralersarput.
Canadap avaannaani tuttut saniatigut tuttu alla kiisalu niisat nungutaanngujoortutut nalilerneqarput allattorsimaffimmullu ilanngunneqarnissaat isummerfigeqquneqarluni.
