Peary-p tuttuata nungutaaqqajaanera Nunavumi piniartunit ernummatigineqarpoq

Akilinermi tuttup Peary-p tuttuatut taaneqartartup uumasut nungutaaqqajaasut allattorsimaffiannut ilanngunniarneqarnera Nunavumi piniartunit ernummatigineqalersoq sapaatiummat radioaviisimi tusarliupparput.

Canadami avatangiisinut ministeri, John Baird, taama aalajangerpoq, Issittumili uumasut allat nungutaaqqajaasut allattorsimaffiinut aamma ilanngunniarneqarput.

Ilanngunniarneqartut tassaapput aarrit, qilalukkat qaqortat, allarsuillu.

Canadami tv-qarfissuaq CBC taama allappoq.

- Tamanna Nunavumi piniartunut kingunerlutsitsisinnaavoq, aalajangiinerlu qulaaninngaanniit naalakkiinertut nalilerneqarsinnaalluni, Grise Fiord-imi, tassa Inuktitut Aussuittumi piniartut peqatigiiffianni siulittaasoq Jaypeetee Akeeagok oqarpoq.

Peary-p tuttuinik siorna ukiakkut kisitsisoqarpoq, ikileriangaatsiarsimasullu paasinarsivoq.

Tassa ataatsimut isigalugit 72 procentinik ikileriarsimasut paasinarsimmat, sumiiffiillu ilaanni 98 procentinik ikileriarsimallutik.